Asil tenun asal lebih berega

KAPIT: Asil tenun diselup ngena akar engkudu bisi pengulih besai diangkat ba makit pengelandik jari menua tu.

Kebuah pia ku Limbun Sanjan, Baju Burung, Kain Kebat enggau Pua Kumbu ti ditenun ari ubung diselup ngena akar engkudu tau basah tauka ulih dibasu.

“Tu bebida ari ubung diselup ngena utai bukai ti enda tau basah tauka dibasu laban tau ngasuh chura tusur lalu pudar.

“Taja pia, nyelup ubung ngena akar engkudu ukai pengawa ti muntang dikereja sereta meseti ka puh enggau liat ati ngereja,” ku iya lebuh dirandau Suara Sarawak.

Nampung randau kami duai silik agi, ibu Limbun ngelansa mimit pasal sekeda chara enggau ripih pengawa nyelup ubung ngena akar engkudu.

CHURA ASAL… Akar engkudu dikena nyura ubung Pua Kumbu nunda buah Sempuyung Matahari

Enti kelia ku iya, engkudu tu sebansa pun kayu ti mayuh tumbuh dalam kampung, nya kebuah mar diulih enggau digiga.

“Tang diatu, paung engkudu kampung mayuh ditanam sebelah nisi rumah tauka ujung bilik di mengeri. Bisi mega sekeda ditanam ba sebelah kaki kebun lada enti ba rumah panjai.

“Kebendar, penumbuh engkudu tu baka kayu kampung bukai, nadai entu beleman ditanam, tumbuh galak kelebih agi ba tanah bebukit enggau emperan.

“Utai ti diguna kitai kena nyelup ubung iya nya urat ti ngundan chura uram (brownish red).

“Urat engkudu tu deka direbus dulu dataika ai mali nyadi chura uram. Udah nya dipegulai enggau daun rengat.

Buah Belia Indai Abang

“Pengawa tu mayuh renggat gawa enggau begunaka timpuh ke lama endur tembu dikereja.

“Nya kebuah asil tenun digaga ari ubung ti udah diselup ngena ai urat engkudu enggau rengat tu enda mudah tusur ngapa laban endang chura asal orang kelia,” lansa iya silik.

Berindik ari nya ku ibu Limbun, rega asil tenun baka pua kumbu, selampai, kain kebat enggau baju burung ti ditenun ari ubung diselup ngena akar engkudu mar agi.

“Pua kumbu pemadu mar kala dijual aku iya nya buah Sempuyong Matahari, ditenun ari ubung diselup ngena urat engkudu, panjai 7″ x 5″ berega RM2,000,” terang iya.

Ibu Limbun nampung pengawa betenun enggau belajar nenun ari indai iya empu, siku indu ti chukup landik ba tunjuk jari ba rumah panjai sida.

Buah Kambut Rajut

Nambahka nya ku iya, penulin chura ubung ditenunka pua kumbu bepanggai ba pengituk orang nyura ubung nya.

“Kami ke ngemeran pengawa betenun chukup beratka kualiti tauka pemanah ubung ti dikena, tan lama lalu enda mudah retai taja manggai beratus taun disimpan.

“Ari nya, kami ngena utai tumbuh tauka chura asal nentuka kualiti ubung dijaga, orang ke meli asil jari kitai mega enda lebu.

“Bisi bala kami nyelup ubung ari serak buluh, akar tarum enggau akar penawar landak kelimpah ari akar engkudu ti dikena aku diatu.

“Ambika chunto, chura biru datai ari akar tarum tauka rengat seraya chura kuning ari akar penawar landak.

Buah Rambai Kemiding

“Pelaba aku, engka mayuh nembiak rebak baru enda nemu penatai chura asal ubung ditenun nyadi pua kumbu tauka asil pengelandik jari datai ari akar untai tumbuh,” ku ibu Limbun nerang.

Kelimpah ari nenun, iya mega landik nusuk manik baka ngaga marik empang, selampai manik enggau baju manik ti mega nerima peminta tinggi ari bala penguna.

“Buah tenun aku ngelamatu neladan ari buah pua ke lama kelimpah bisi nengkebang buah pua kediri empu.

“Tang suah agi aku nunda buah sida ke tuai enti kenyap manah lebuh ngayanka keduran lemai dulu, sebedau berengkah nenun buah nya.

“Kebuah pia laban bisi sekeda buah enda tau ditenun ngapa nangika kitai tau alah bulu lalu tau pulaika pemedis ngagai diri empu,” terang iya.

Buah Rang Jugah

Iya madah, entara penama buah pua kumbu suah ditenun iya baka Rang Jugah, Belia Indai Abang, Sempuyung Matahari, Kambut Rajut, Rambai Kemiding enggau mayuh ke bukai.

Ngenang pasal dagang asil pengelandik jari, ibu Limbun madahka diri nadai entu pelasar ke entap naka diatu.

“Asil utai ditenun enggau manik ditusuk aku dijual ba sebarang endur enggau enti sema bisi peminta.

“Bisi nya dijual aku ba kedai kraftangan, kala mega enggau orang bejual maya bisi pengerami kelimpah ngelakuka asil jari diri empu sebelah media rama baka Facebook.

“Bisi mega sida ke kala meli asil tenun enggau manik aku bepadah ngagai bala bakih enggau kaban belayan diri ketegal rinduka pengalus enggau pemanah.

PUH… Pemanah buah enggau chura pua kumbu ke manding dipegulai bepanggai ba pengepuh orang ke nenun.

“Sida tu kira orang ke meli tetap tauka semampai meli asil pengelandik jari ba aku,” ku iya temegah ati meda asil jari dikerindu bala mayuh.

Pia mega ku ibu Limbun, bisi sekeda ngasuh ngaga chura enggau buah dikedeka sida lalu iya nadai beleman nurutka peminta sida ke meli nya.

Besai juluk ati iya deka nitihka singkang rebak baru ti nempa penyulut ba dagang nengah pelasar digital, ke alai makit besai agi lalu ulih rembus ngagai tikas entarabansa.

“Aku ingin amat deka ngerembaika penemu enggau singkang diri empu ngambi ulih mujur baka pedagang asil pengelandik jari bukai, bulih asil lebih ari ke udah.

“Aku mega ngarapka pengawa betenun tauka asil pengelandik jari bukai enda mudah punas ngapa lalu semampai dikemeran dataika jemah.

“Aram mih kitai bela ngetanka pengawa asal aki ini kitai tu ngambika bisi dipeda enggau ditampung rebak dudi,” ku iya nyimpul randai.

INDU RUMAH PANJAI… Ibu Limbun ngemeranka pengawa asal indu Iban di rumah panjai.