KUCHING: Kuching terus ngentap penuduk nyadi hab lumba ekstrem serantau nengah pengawa ngatur DBKU International X-Games 2026 ti deka diatur ba Tebing Ai Kuching ari 8 nyentuk 12 April tu.
Lumba diatur Dewan Bandaraya Kuching Utara (DBKU) nya diatur enggau kerejasama Opis Menteri Nembiak, Lumba enggau Pemansang Orang Dagang Sarawak sereta Canard Group lalu mega bekerejasama begulai enggau Canroll Pro Urban Sports Festival.
Besuluka jaku Unleash the Action, edisyen sekali tu diatur besai agi berindik ari pemujur edisyen ti dulu, seraya mandangka komitmen nyungkak pemansang lumba ekstrem ba nengeri tu.
Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah madah, minat ngagai lumba ekstrem diatu majak nambah ba renggat global nyengkaum di Sarawak, ngaul disiplin baka BMX, skateboarding enggau rollerblading.
“Trend tu majak nambah. Lumba diatur sekali tu ukai semina ba darat tang mega dikerembai ngagai lumba ai baka lumba jet ski lalu nyadi pematak festival tu,” ku iya.
Karim madah munyi nya ba aum pemberita, ditu kemari.
Ku iya, lebih 200 atlit lumba ekstrem ari menua tu enggau menua luar disadang ngambi bagi, ngujungka Kuching nyadi panggau besai aksyen intensiti tinggi ti sarat enggau elemen pemerani, kreativiti enggau pengelandik teknikal.
Entara menua ti ditaga ngambi bagi nyengkaum Perancis, Afrika Selatan, Brunei, Singapore, Indonesia enggau Thailand.
Pekit ngaul kategori Junior (baruh 15 taun) enggau Tebuka enggau mayuh lumba baka aggressive rollerblading, BMX flatland, BMX stunt, skateboarding, lumba ai (jet ski), street basketball sereta pickleball mega disedia dikena matak mayuh agi penyereta.
Berebak enggau nya, Karim nyemetak madah ke lumba tu nyadi pelasar besai ngagai atlit menua ngansah penau ba renggat antarabansa sereta ngerandang peluang besilih peneleba begulai enggau bala penyereta menua luar.
“Program tu ukai semina nyendia panggau kompetitif ngagai atlit, tang mega nyadi medium strategik ngelaku Sarawak nyadi palan besai lumba ekstrem, seraya negap raban nembiak ngambi ransing agi ngambi bagi ba aktiviti bepengerai enggau besemekih,” terang iya.
Kelimpah pekit, mensia mayuh kelebih agi raban nembiak mega ulih ngulu woksyop skateboarding enggau rollerblading ti diatur mega nyendia pengelandik pemun sereta sukut pengelikun ba lumba nya.
Ku iya, DBKU mega nyemetak madah ke lumba nya ulih meransang budaya belumba, meransang gaya idup bepengerai sereta nyagu nama Kuching nyadi mengeri progresif enggau ngelantang nembiak ba tikas antarabansa. – EDISI UKAS
