KUCHING: Pekit olahraga terus nyadi lubuk emas ungkup Sarawak pengudah mujur bulih empat midul emas ba lima pekit nya serimbai Lumba Borneo Kuching 2025.
Midul emas keterubah diulih nengah pekit 5,000 meter (m) jalai kaki kategori lelaki ti diari ke Muhammad Farish Yazid Mohamad sereta ngerikod timpuh 27:21:39.
Lebih manis, midul pirak enggau engkeraju bela diempu atlit tuai rumah iya nya Muhammad Niq Aizad (28:31:38) enggau Eldysean Luyoh Edwin (30:17:56).
Midul emas kedua datai ari Voon Pei Ling nengah pekit nikau leka bedil kategori indu enggau penyauh tikau 11.27m.
Berebak enggau nya, iya mujur ngalahka atlit ari kontinjen sebaka, Ng Jin Jun ti nikau 10.91m penyauh lalu midul engkeraju diempu Tiffany Corrent Berain (10.63m).
Freddy Ato nengah pekit nikau sangkuh mujur ngulih midul emas ketiga pengudah ngaga tikau 50.45m penyauh.
Semekih ari bakih sama kontinjen ngemataka Desmond Jong Wei Xiong semina ngempu midul pirak enggau tikau 49.97m lalu midul engkeraju diempu Bonster Henry (45.71m).
Ngalih ngagai pekit 800m kategori lelaki, atlit Sarawak sekali da bulih midul emas.
Danial Hakim Mohammed Omar mujur ngemegah Tanah Kenyalang pengudah ngerikod timpuh 1:58:55 sereta ngalahka atlit Wilayah Persekutuan Labuan, Mohammad Nafiq Hussin (1:59:24) ti menggi midul pirak lalu atlit Brunei Darussalam, Kasyful Asymawi Khairul (1:59:33) ngempu midul engkeraju.
Ba pekit olahraga, Sarawak mujur bulih empat midul emas, empat midul pirak enggau empat midul engekeraju. – EDISI UKAS
