SIBU: Pedagang bansal Bazar Ramadan ba Dataran Tun Tuanku Bujang Fasa II deka dipatau rat deka nentuka tikas pemeresi pemakai ti dijual.
Kaban Kunsil Nengeri (ADUN) Nangka, Datuk Dr Annuar Rapaee, nyemetak madah atur deka diterit ngagai pedagang ti enda ngemeratka isu pemeresi.
Ku iya, nya nyengkaum enda dikemendar bedagang pengelama dua minggu.
“Kitai deka mantaika lumur kompelin ngambi mensia mayuh ulih kompelin nengah WhatsApp ke alai lumur nya deka dipadah dudi.
“Tu nentuka pedagang semampai nitih sereta ngemeratka tikas pemeresi pemakai enggau bansal sida,” ku iya pengudah taklimat begulai enggau pedagang Bazar Ramadan ditu, kemari.
Sapit Menteri Pelajar, Inovasyen enggau Pemansang Penau Sarawak nya madah bisi 100 pedagang deka bejual ba bazar nya ila.
“Aku udah madah ngagai pedagang, sida meseti nyaga pemeresi dikena nyeliah sebarang penusah enda disadang nyadi.
“Kitai nemu sekeda pedagang ngulihka pemakai sida ari pemekal laban ukai sida ti nyendiaka nya lalu nya kebuah, pemakai ti enda abis jual deka dijual hari siti.
“Pemakai ti deka dijual baru engka udah bari tauka bebau lalu sida ti makai pemakai nya ulih pedis perut lalu kami enggai pekara nya nyadi,” ku iya nyemetak.
Berindik ari nya, iya madah, pengatur bazar deka bekerejasama rat enggau Opis Menteri Pengerai Malaysia (KKM) sepemanjai pengawa bejual nya diatur.
Ngenang pasal bazar nya, Dr Annuar madah, konsep bebida taun tu ke alai pengusung ulih makai ba palan nya.
“Kami deka nyendia endur ngengkah mija ba tengah bazar ungkup pengusung makai enggau bebuka puasa lalu kami mega deka nyendiaka endur sembiang ungkup raban Islam,” ku iya.
Bazar Ramadan ti deka belabuh 11 March ila diatur Palan Servis Nangka lalu dipejalai Gerempung Pedagang Sibu sereta Gerempung Orang Dagang Begulai Sibu.`






