KUCHING: Kaban Kunsil Nengeri (ADUN) Meluan, Datuk Rolland Duat Jubin merambu timpuh Aum DUN ditambah ari 10 hari ngagai 14 hari. Ku iya, perambu nya berindik ari sida begunaka mayuh agi awak dikena bala ADUN bejurai sekeda pekara enggau komprehensif sereta silik agi.
“Empat hari tambah nya beguna dikena nyendia awak ti chukup ungkup nyaut mayuh agi tanya lalu pengari rayat kelebih agi ari menua pesisir lantang bejurai isu kritikal ti ditapi rayat ba sitak sida.
“Penanggul ke diatu iya nya natak awak bejurai enggau pengawa mansik baru polisi ti deka dibantai, seraya mayuh isu begunaka perati lengkas kelimpah ari komitmen perintah ngiga chara mutar penanggul ti meruan,” ku iya.
Rolland bejaku munyi nya lebuh bejuraika Rang Undang-Undang (RUU) Belanja (2026) ba Aum Kunsil Nengeri (DUN) Sarawak ditu, kemari.
Dulu ari nya, iya minta sekeda genturung di Meluan dipasuk ba rintai pengawa nyambung bekal kuasa karan ba baruh Program Bekal Kuasa Karan Menua Pesisir (RES), nyengkaum Rumah Thresa, Batu 15 Jalai KJD Julau, Rumah Sandra Umban Jagan, Batu 10 Jalai KJD Julau, Rumah Engkiau, Serau, Rumah Steven Jinggut, Serau enggau Rumah Brayan, Rantau Ulu Kanowit.
Ku iya, isu bekal ai mega bela diberi perati lebuh iya mantai penanggul ti agi nyadi ba sekeda genturung di Pasar Julau, Jalai KJD enggau Jalai Engkamop ti begunaka perati khas ari raban bekuasa.
“Aku ngerah atur timpuh pandak ti proaktif agi dibantai, ukai semina chara reaktif lebuh bisi penanggul bekal ai laban semua rayat ti kena empas patut diberi perati khas sereta perambu silik patut diambi.
“Nya alai, aku minta pansik komprehensif senentang pengelikun bekal ai di Meluan bekau ari insiden ai kamah empai lama ti ngujungka tangki nya ditutup lalu minta penerang pasal timpuh pandak enggau timpuh panjai ti diperambu dikena nentu bekal ai ti likun ungkup penguna,” ku iya.
Rolland madah, pekara nya patut diperatika ngenang pemesai guna nentu pengelantang pendiau rayat menua pesisir dikemerat setipak enggau aspirasyen pemansang Sarawak.
