Aum Dun: Pelasar ngiri penemu, peneleba

KUCHING: Sepenyampau 127 iku nembiak ari Universiti Malaysia Sarawak (Unimas) ti ngambi Program Kajian Politik dan Pemerintahan bisi datai mendingka aum hari ketiga Renggat Keempat Dun ke-18 ditu, tadi.

Raban ti diuluka Wan Muhd Sazwandy madahka tuju pejalai sida sebuat endang deka mendingka aum Dun seraya bejalai meda penyikap enggau pemanah rampa tinjau ari begunan nya.

“Kami sebuat datai ari nembiak taun satu enggau dua lalu pejalai kami kitu disempulang dua pengelicha.

“Tuju bukai pejalai kami deka ngasaika baka ni chara bala Adun nanya, nyara enggau bejuraika penemu ungkup pemaik rayat ti udah milih sida nyadi pengari,” ku iya.

Abdul Wafi, 22, ari Selangor madahka diri chukup temegah diberi peluang mendingka aum bala pengari rayat di menua tu.

Dick Lembang Dungun

“Aku udah lama ingin deka kitu mending enggau meda empu baka sida baum, bejurai, betalat enggau nyara penemu,” ku iya.

Kelimpah nya, ku Fredrick Bin Lawrence, 22, ari Mukah, iya chukup lantang ulih mendingka aum tu laban udah lama nganti peluang ngelawa endur tu.

“Kami benasit amat ulih datai kitu lebuh bala Adun aum.

“Lebuh mansang kitu tadi (kemari) aku enggau bala bakih bela gagit berandauka pasal aum tu nyadi laban semua kami baru keterubah datai ditu.

Nangkan nya, Dick Lembang Dungun, Pengelicha Unimas madah atur aum tu nyadi sebagi ari batang pelajar kus sida.

“Kami ngemai sida datai kitu laban deka ngasuh sida berati enggau belajar chara mansutka penemu sereta ngasaika peneleba ngatur aum renggat nengeri.

“Tu mega meri sida awak chara ngelangkar polisi enggau undang-undang menua ngena chara ti ngasi sereta nitihka peneka enggau nangkup peminta rayat renggat baruh,” ku iya madah nyemetak.

Suara Sarawak