Bajet 2020, berita ‘sinu’ ungkup Sarawak

“Enti nunda Sarawak enggau Sabah patut nerima 30 peratus ari semua penyampau bajet pemansang, nitihka manifesto Pengawa Bepilih Besai Ke-14 (PRU14).”

KCUHING: Bajet 2020 mai berita ‘sinu’ ngagai rayat nengeri Sarawak, pia ku Kaban Kunsil Nengeri (Adun) Tamin Ir Christopher Gira Sambang.

Iya madah, enti nunda Sarawak enggau Sabah patut nerima 30 peratus ari semua penyampau bajet pemansang, nitihka manifesto Pengawa Bepilih Besai Ke-14 (PRU14).

“Tang, semina nengeri kitai semina nerima RM4.4 billion aja lalu RM5.2 billion (Sabah) tauka kedua nengeri tu diungkupka RM9.6 billion aja ari RM58 billion semua penyampau Bajet 2020, ” pia ku iya madah ngagai pengarang berita, kemari.

Ku Gira, Sarawak nengeri ke pemadu besai di Malaysia tang nerima agih ke mimit nyengkaum enti dibida enggau negeri Sabah.

“Sarawak patut diungkupka mayuh agih ari semua bajet tu dikena ngaduka semua bansa pemansang ngambi titihka tikas pemansang nengeri bukai di Malaysia.

“Nya alai, Bajet 2020 tu berita ti sinu ke diterima rayat nengeri Sarawak,” ku iya madah baru.

Nambahka jaku iya, Gira madahka agih ke chukup beguna dikena ngaduka pemansang menua pesisir lebih agi baka jalai alun, bekal karan, ai paip sereta ngemanah enggau ngadu sekula.