Bajet pelajar patut dikena manah

KUCHING: Sarawak Teacher’s Union (STU) ngarapka agih ari Bajet 2020 ti diungkup ngagai sekula nengeri tu deka dikena enggau manah lalu deka mai pemaik ngagai pekara pengelikun enggau pengelantang nembiak belajar.

Presiden STU Macky Joseph madah, sida endang udah ngadang sekali agi Opis Menteri Pelajar deka diungkup mayuh alai taun tu diberi RM64.1 billion enti dibida enggau RM60.2 billion ba taun 2019.

“Pekara tu bepun semua menua endang ngemeratka pemujur pelajar.

“Ari nya mega, perintah meri RM783 juta dikena ngemanahka sekula repuk lebih agi di Sabah enggau Sarawak.

“Taja pia, STU ngarapka pekara tu dipenyadi enggau lengkas agi,” pia ku iya madah kemari.

Nambakhka jaku iya, Mackey bela ngarapka sekula baru digaga di Sarawak baka langgur deka ngaga sekula baru di Semenanjung Malaysia bepun ari sekula di nengeri tu sekut sereta bisi mega kelas enda chukup endur belajar.

“Kelimpah ari nya, kami berasai lantang ati enggau pengawa netapka sekula perintah bisi perengka guna dikena raban OKU seririh enggau ‘zero reject’ ti digaga Opis Menteri Pelajar sentang semua OKU endang bisi hak.

“Ukai semina nya, STU bela berasai temegah ati laban ungkus utiliti ti maja niki bela dikemeratka bajet serak tu nenah agi RM12 juta ti dikeandalka ulih ngelempungka belanja mayar utiliti ngagai dua ribuh buah sekula bantu perintah,” ku iya madah baru.

Bajet 2020 mega dipuji STU ari agih khas RM500 ngagai raban pengereja pengawa perintah Gred 56 ke baruh.