SERIAN: Tangki Ai baru ba Balai Ringin meseti digaga dikena nangkup peminta bekal ai ti majak nambah.
Adun Balai Ringin, Datuk Snowdan Lawan madah, nya berindik ari Tangki Ai Balai Ringin enda ulih nangkup peminta ti ngelui ari bekal ai ke bisi diatu.
“Bekal kuasa karan ba Dun Balai Ringin udah disikap penuh tang bekal ai beresi aja semina 36.5 peratus ulih disedia ngagai peranak nyentuk Pasar Balai Ringin naka diatu.
“Pengudah sitak Pasar Balai Ringin, endang nadai bekal ai beresi ulih disedia ngagai peranak dia, manggai 80 genturung pendiau apin nerima bekal ai seraya 32 genturung pendiau udah nerima bekal ai beresi.
Snowdan mansutka jaku nya pengudah bejadi Program Makmal Mini Pelilih Mit Balai Ringin di Roxy Hotel, ditu tadi.
Ku Sapit Menteri Dagang Temuai, Industri Kreatif enggau Seni Pemerindang nya, sebuah tangki baru meseti digaga ngena agih belanja urung RM300 juta dikena nyendia bekal ai beresi ngagai rayat ba sitak iya nyentuk Kampung Spaoh di Simunjan.
