DUNYA pemerindang Dayak sekali da richah enggau penatai lagu single pemadu baru ari artis Judson Madang ti pejuluk Bangat Berumban.

Lagu berentak dangdut tabla nya mujur dikeluarka nengah pelasar YouTube ZRY Music Production kena 18 Januari tu tadi.

Bangat Berumban ukai semina dikena merindang bala peninga aja tang mai kitai nyelam cherita pengerindu ti jelungan enda datai ba adan.

JELUNGAN
Nerang silik pasal lagu nya, Judson madah, lagu nya ngenang siti cherita pengerindu ti chukup sinu enggau negu tangkai ati.

Iya madah, naka mih pemanis enggau pemanah pengerindu dua iku sulu ti benung nanggam pengerindu enda nyalah baka bungai ti benung ngerembai tumu pagi.

“Laban ti udah mabuk ipuh pengerindu, semua utai asai ti manah enggau menyana magang.

“Seduai udah anyut dalam dunya seduai empu enda nyalah asai ke seduai aja ti ngempu dunya tu,” ku iya.

Nangkan nya, iya madah, tentu bala peninga kala ngasai ke pengasai sebaka laban genap iku kitai kala mabuk pengerindu.

Ku tampung iya, andal mih lelaki nya ngumbai pengerindu seduai ulih beretan lama nyentuk ke ila lalu ulih nirika ruang bilik baka orang bukai.

“Pengerindu nya baka mua hari, kitai ngarap ulih panas nyentuk ke lemai tang enda memukai ujan bangat disempulang biau balai mangka di tengah hari.

“Baka nya mih pengerindu dua iku sulu dalam lagu tu, seinchi nadai mih lelaki nya nyangka pengerindu seduai baban karam di tasik pengasa.

“Pengudah pengerindu seduai benung manah ngerembai enda memukai indu nya ninggalka sulu ati iya tekapa-kapa kediri.

“Nadai ujan, nadai ribut, nadai laya, enda memukai indu nya nyurutka diri empu lalu enggai agi nerus pengerindu seduai.

“Nya mih ti ngasuh ati lelaki nya balat anchur laban orang ti pemadu dikesayau enggau berega ba ati iya, mutuska tali pengerindu seduai.

“Lelaki nya chukup enda nyangka, pengerindu tuchi seduai ngelama tu tau beujung baka nya.

“Nyentuk iya majak betanya nama kebuah tau nyadi baka nya? Nama penyalah iya dikeduan ngeraya nya?

“Dini mih pengilap iya nyentuk sulu ati iya kempang ninggalka iya kediri lemas ba lubuk tanya…betanya-tanya ngiga kebuah indu nya tau ngayahka iya baka nya,” ku tusui Judson.

Tandu artis beumur 24 taun nya, pengudah ditinggal pegi nya baru lelaki nya ngeleda iya semina penyangkai alai ngenduh aja.

Naka mih pengelebu enggau penyiru lelaki nya, ku iya, pengudah nemu diri empu semina penyangkai aja.

Iya nyemetak madah, kisah dalam lagu nya nadai mangki pengidup iya laban penengkebang leka lagu nya, Zairy bulih inspirasyen nengkebang lagu nya ari kisah ba siti movie ti dipeda iya.

BISI PENGELAIN
Kebendar, lagu Bangat Berumban nya udah lama ditengkebang Zairy lalu disimpan iya kenyau ari taun 2021 suba.

Nitih ke perampu, lagu nya sigi ditengkebang ungkup iya empu tang atur Petara jauh bebida.

Pengudah ngelala Judson, iya chukup temegah enggau penau sereta pemanah petah nyawa artis biak nya.

Zairy ngasai Judson mih orang ti chukup engkeman nyadaka lagu Bangat Berumban nya.

Kebuah pia laban iya ulih ngasai ke feel enggau range ari vokal Judson nyema iya nyadaka lagu nya.

Nya alai, iya enda belampung ati ngelempai pengandal ngagai Judson nyadaka lagu nya.

Lebuh keterubah ngerikod lagu nya, bujang Miri nya madah ke diri gagit sereta ngasai pengelain lebuh nyadaka lagu nya.

“Lagu Bangat Berumban bebida ari lagu bukai laban tu siti lagu berentak dangdut tabla.

“Tu mih keterubah aku nyadaka lagu berentak tu lalu udah tentu tu siti peneleba ti besai reti ba aku,” terang iya.

DIPARIT APAI
Buah labuh sigi enda jauh ari pun, siti sempama ti chukup engkeman dikena nusui pasal pengerindu Judson ba pengawa belagu.

Pengerindu belagu dikembuan iya kenyau ari mit laban apai ti dikesayau ke iya sigi orang ti rindu mekuh ke pengawa nya kelimpah landik nebah kereban muzik baka gita enggau keyboard.

Nya alai, enda alit ati nyema Judson landik sereta pintar belagu laban pengerindu iya ba pengawa nya endang diparit apai iya empu.

“Apai mih ti nyadi inspirasyen aku mekuh pengawa merindang tu laban lebuh iya agi biak suba, iya chukup regas nebah kereban muzik kelimpah rindu belagu.

“Pengerindu aku ba pengawa tu berekat ari embing enggau peransang apai lalu lebuh aku mutus ati nyingkangka kaki ba dunya pemerindang Dayak, iya mih orang keterubah nyukung aku,” terang Judson.

Iya mekuh dunya pemerindang Dayak kenyau ari taun 2019 pengudah abis Pom 5 lalu naka diatu iya mujur ngeluarka tiga iti lagu.

Nya nyengkaum lagu Enggai Badu Ngenang ti ngepunka pejalai iya nyadi pemerindang sereta dientudi ke Tua Nyadi Satu lalu pemadu baru iya nya Bangat Berumban.

TERUS KE SUKUNG
Baka bala artis bukai mega, Judson bela ngasai ke pait manis pejalai nyadi siku pemerindang.

Iya ngaku, peneleba pait nya mayuh tang chukup mih iya enggau Tuhan aja nemu lalu peneleba nya mih ti ngasuh iya majak kering.

Nangkan nya, iya madah, peneleba manis lebuh iya majak dikelala mensia mayuh lalu bala bakih semampai meri sukung tegut ngagai pengerindu iya belagu.

Anak keempat ari semilan iku diri menyadi nya ngarap lagu Bangat Berumban nerima timbal manah ari bala peninga lalu lekat ba ati sida.

Iya mega bela nyelitka lalau ngagai sida ti benung nanggam pengerindu ngambi enda beduan pangan diri baka kisah dalam lagu Bangat Berumban.

Sebedau ngujungka randau, nembiak Politeknik Mukah ti ngambi Diploma Mechanical Engineering nya meri besai terima kasih ngagai semua orang ti nyukung pejalai iya merindang ngelama tu.

Kelebih agi, ku iya, bala peninga ti dikesayau, bakih, bakih sama industri, kaban belayan enggau sida sebilik.

“Terima kasih mayuh-mayuh lalu sukung enggau sampi kita mih ti ngasuh aku ransing agi deka ngeluarka mayuh agi lagu pengudah tu.

“Nya alai, aku ngarap semua kita terus meri sukung tegut ngagai aku laban enti nadai sukung ari kita, aku ukai sapa-sapa,” ku iya netak randau.