Bansa minoriti meseti ransing ba pekara pelajar

MIRI: Pekara pelajar endang nyadi kunchi dikena komuniti ti minoriti di Sarawak napi pemar bekau segang pemansang ke maya hari, ku Kepala Menteri Datuk Patinggi Abang Johari Tun Openg.

Iya madah munyi nya rambau Pengerami Makai Lemai Ngumpul Belanja ‘Ngangkatka Bansa Kayan Nengah Pekara Pelajar’ diatur Gerempung Kayan Sarawak (PKS) ba sebuah hotel tebilang ditu, kemari.

Kenu ku iya, kebuah laban nengah pekara pelajar, pengidup sesebengkah bansa ari menua pesisir ulih berubah seriris enggau ubah pemansang menua.

“Enti sesiku orang nya udah disikap enggau penemu teknologi enggau pekara baru, tentu iya ulih mujur enda ngira dini alai iya mindah,” ku iya.

Abang Johari nyemetak madah, ulah baka tu beguna amat lalu patut dikemeranka raban bansa Kayan ngambika ulih teulihka pemujur sebaka enggau bansa bukai di Sarawak.

PERANSANG PELAJAR….Abang Johari nyuaka setipikit nyulut ngagai siku anak Kayan ke udah bulih pemutus peresa ke nyulut ba pelajar sekula.

“Aku agi ingat diberi tanggungpengawa nyaga raban bansa Penan diasuh Tuai Pemegai Menua (TYT) Tun Pehin Sri Abdul Taib Mahmud maya aku terubah iya nyadi kepala menteri.

“Maya nya, aku madah ngagai iya enti kitai deka meda bansa Penan maju ba nengeri, chara iya kitai meseti meri sida penemu pelajar,” ku iya.

Berebak enggau nya, iya mega madah iya nya semina anak Sarawak aja nemu pengingin enggau guna rayat b anengeri tu.

“Nya alai aku deka madah, diatu udah datai maya iya kitai mandangka Sarawak enda mudah dikeduan lalu tejuka kitai empu nyadi diri empu.

“Nya kebuah, aku mai Gempung Parti Sarawak (GPS) laban orang Sarawak aja mereti pasal rayat nengeri tu diuan mayuh pupu bansa.

Kelimpah nya, Abang Johari mega mantaika juluk deka meda Sarawak nyadi nengeri pemadu mansang manggai taun 2020.

“Reti nya, kitai meseti ngemanahka perengka infrasktruktur ba selampur menua.

“Aku deka bebendar ngemansang nama utai ke udah disemaya taja pejalai pengawa nya ngambi awak,” ku iya seraya nangkan nama utai ke disemaya ungkup rayat deka dikeamat.

Berebak enggau nya, iya madah pengandal ati iya nya pengasa rayat nengeri tu ba Bajet 2020 ari Perintah Besai deka diubat nengah Bajet Sarawak 2020.

“Tu deka manah agi ari bajet sida (Perintah Besai,” ku iya.

Nyau deka 2000 iku bansa Kayan datai ngerichahka pengerami lemai nya seraya nyuaka insentif pelajar nyulut enggau anugeruh khas lumba ke dipenyadi Abang Johari.

Berebak enggau nya, iya mega madah deka meri bantu RM100, 000 ngagai PKS ungkup tuju ngatur program pelajar.

Ukai semina nya aja, pengerami makai lemai nya mega mujur tegumpulka turu penyampau RM13, 690 nengah pengawa nyual tiket chabut betuah ke dipejalaika Biro Pelajar PKS.

Sama datai Menteri Perengka Pengangkut Datuk Lee Kim Shin, Menteri Muda Dagang Temuai enggau Main Asal Datuk Sebastian Ting , Menteri Muda Pemansang Orang Indu, Ruang Bilik enggau Anak Mit Rosey Yunus.