Bantu ari GPS nadai ngira bansa, pengarap

KANOWIT: Perintah Gempung Parti Sarawak (GPS) mantaika mayuh bantu ungkup pemaik rayat ba nengeri tu.

Kaban Kaunsil Nengeri (Adun) Machan Allan Siden Gramong madahka pekara tu ngayanka Perintah GPS tu sebuah perintah ti siruka nasip rayat enda ngira bansa enggau pengarap.

“Semua agih bantu diberi sebela ngagai sida ti bulih bantu nya nitihka atur ti patut.

“Tang kami beratka bantu tu ngagai rayat ba kandang menua pesisir laban GPS deka ngemansangka kandang menua pesisir sebaka enggau mengeri.

Iya mansutka jaku nya lebuh ngabas ngenyit sekeda rumah panjai tu nerima Projek Nyeleti Rumah Rayat Seranta Sarawak (PPRMS) ditu kemari.

Allan Siden Gramong

Sida sebuat ngabas Rumah Roma di Sungai Bukong, Rumah Bandar (Sungai Majau) enggau Rumah Besi (Sungai Maong) disempulang bala ketuai raban bansa.

Pia mega ku iya, rayat menua pesisir anang irau laban perintah enda ngelaungka sida nerima bantu ti udah disedia.

“Nya alai, aku seruran ngansak bala ketuai raban bansa tauka Tuai Rumah seruran beratika pekara ditapi sida serumah.

“Ripot ngagai aku nyema bisi sida serumah napi penanggul tauka sebarang rumah panjai ti begunaka bantu.

“Kitai enda enchadi tauka milih lebuh nyuaka bantu ngagai rayat nitihka pematut sida nerima bantu nya,” ku iya.

Berebak enggau nya, Allan madahka tuju iya ngabas kia laban deka nentuka rumah panjai ti nerima bantu PPRMS disediaka tu enggau chara ti betul.

Nangkan nya ku iya, PPRM diberi ngena chek nitihka penyampau dipinta bebelika perengka rumah enggau pekara bukai.
“Pengawa tu endang tanggungpengawa aku nentuka bantu diberi dikena chara ti betul enggau meri pemaik ngagai rayat,” ku iya nerang silik.