SELANGAU: Pengawa nganjung bantu barang pemakai beserimbai enggau timpuh Atur Tagang Pejalai (PKP) mengkang dipejalaika dikena nyaup genap iku rayat ba menua tu.

Kilah ensana, sepenyampau 6,708 iku peranak ba sitak Dun Tamin udah nerima bantu renggat keterubah ari Adun Tamin Ir Christopher Gira Sambang ba Balai Mayuh Guna Selangau.

Bantu tu mega deka diberi ngagai rayat dia ke empai nerima lalu deka disadung chara berenggat nangkan nya berengkah ari sehari tu.

Semina Tuai Rumah enggau beberapa iku raban Komiti Pemansang enggau Pengelikun Genturung Pendiau (JKKK) rumah panjai aja datai ngambi bantu.

Tu dikena nyeliahka penusah kelalu mayuh orang datai seririh enggau PKP ti benung dipejalaika maya tu.

Gira enggau nya ngarapka bantu ulih ngelempungka tating belanja rayat dia bepun ari bepenanggul ngulihka penatai pemisi sekumbang PKP tu.