Bantu mih anak Sarawak ngerembaika pengelandik

KUCHING: Sarawak ngembuan mayuh penengkebang ti bisi penau taja sida jarang diberi peluang mantaika penau pengelandik diri.

Direktor Filem Bungai Ngerembai Robin Lai madahka ‘pintu’ agi bedau dibuka ngagai sida ti ngembuan peneleba tu.

“Aku pechaya, Sarawak ngembuan mayuh nembiak ti bepenau.

“Taja pia, bedau bisi orang muka ‘pintu’ ngagai sida, nya alai aku ngarapka perintah mantu bala sida nya,” ku iya.

Robin bejaku munyi nya ba aum pemberita Filem Bungai Ngerembai di sebuah restauran ditu, pagi tadi.

Iya ti mega nyadi direktor filem Bungai Ngerembai madahka kebendar filem nya diapdaptasyen ari sebuah filem ‘aksi komedi’ menua Taiwan lalu disalin ngagai Jaku Melayu enggau Jaku Iban.

Taja pia, ku iya jalai cherita filem nya diubah ngambika engkeman ngagai menua Sarawak.

“Stail cherita tu lebih ngagai pengidup kitai Sarawak ngena pelasar moden.

“Tuju filem tu digaga endang deka madah ngagai dunya dini endur menua Sarawak ti tebal agi diuan bansa Iban,” ku iya.

Tambah iya, mayuh filem bukai baka Jipun, Korea enggau China ngetanka jaku asal sida ba filem moden.

“Nya kebuah nadai salah endur kita ngaga filem ti ngena jaku asal (Jaku Iban) dalam filem moden.

“Kitai mega deka madahka ngagai orang luar Sarawak udah moden seraya orang ari menua bukai ulih belajar jaku asal menua Sarawak.

“Enti aku enda ngaga filem ti baka tu, nadai orang deka ngaga,” ku iya.

Nangkan nya, ku iya filem ti becherita sentang tiga iku menyadi ti pambar tu dipelaba nelan ungkus belanja RM4 juta.

“Palan endur ngaga filem endang ba selampur mengeri Kuching sereta pengujung cerita tu gaga (happy ending),” ku iya.