Barracuda Raja Sungai Rimbas

Tim Barracuda 69 ti chukup kering ba luan nadai sebarang tim ulih ngelih ngujungka tim ari Kampung Kalok nya dipadu ngempu gelar Raja Sungai Rimbas ungkup renggau kedua kedua (terubah 2017) lalu sida mai pulai perais RM8,000 ba renggat Regata Pusa 2019 beserimbai enggau Pengerami Pesta Pusa ke tembu diatur kemari.

Nitih penerang perau nya endang tim baru ke terubah iya nyereta pekit serak tu.

Nitihka dijangka, tim dipelanja Megatech nya nyengala enda ngelebu penyukung sida.

Ba pekit kepenudi Sakai 30 nya, sebuah agi perau sida iya nya Barracuda 10 dipadu nyadi pemenang lumur dua ditangkan Wali Putih Pusa 5 ba penuduk lumur tiga.

Taja pia, juluk sida deka nyapu beresai gelar champuin ba semua pekit puntan pengudah tim Wali Putih dipenggi Abu Seman Jaya mujur ngelih sida ba pekit Sakai 15 ke diatur urung pukul 3 lemai.

GAGA ATI … Razaili sereta temuai bukai begambar kenang enggau tim Barracuda pengudah dipadu bulih gelar Raja Sungai Rimbas 2019. Gambar OSMAN RAZALI

Kenyau menalan dibuka kena pukul 10 pagi nengah pekit lumba Sakai 20, Barracuda terus ngayanka pengering pengudah sida mujur nyadi champion enggau lumur dua nengah perau Barracuda 10 enggau 9. Lumur tiga dipenggi Wali Putih Pusa 6.

Pemutus ke sama dirikod ba pekit kepenudi lumba Sakai 10 enggau 25 ke diatur nangkan nya.

Ungkup Sakai 10, Barracuda 8 nyadi champion enggau Barracuda 7 bulih lumur dua, udah nya Wali Putih 3 bulih lumur tiga.

Nangkan nya ungkup Sakai 25, tim Barracuda 10 enggau Barracuda 9 bela ngengkah diri nyadi champion enggau lumur dua. Anak menyadi Abu Seman Jaya (Wali Putih 5) sekali agi bulih lumur tiga.

Cherita nya mengkang enda berubah nyentuk lumba kepenudi Sakai 15 ti mandangka Barracuda 8 puntan nyadi champion. Pemutus beratika PBB Tambuakar Saribas 2 dipenggi Yak @ Sebeli Kudang mujur bulih lumur tiga.

NADAI ULIH LABAN … Tim Barracuda 69 kediri nuju adan pekit.

Pemutus penuh, lumba bejalai enggau mujur laban ngembuan semangat lumba ke tinggi.

Tebal agi bala temuai ke datai tepaut ati meda pengering tim Barracuda, tang sida ngasai pengering Barracuda di Sungai Rimbas serak tu enda ulih nyadika tiang sukat pengering sida ke amat.

Pekara tu laban nadai sebarang tim lumba perau ke besai nyereta Regata Pusa laban sereta hari enggau Regata Tambirat.

Mayuh minta tim Barracuda mandangka pengering sida maya Regata Sarawak di Kuching ujung taun tu.

Pengerami tim Barracuda Mohidin Bolhassan madah nembiak redak iya endang patut bulih pemujur nya.

“Sida belatih, sida seati lalu ke beguna amat ngembuan semangat lumba ke tinggi.

“Menang dua kali bulih gelar Raja Sungai Rimbas endang ngemegah.

“Aku nemua semua pengayuh udah bebendar pengelama tiga hari pekit lalu pulai mai pemujur,” ku iya.

Ku iya rambai jaku ‘kebo sampey mpusak’ meri peransang ke balat ngagai semua sida.

Iya meri pengaga ati ngagai semua piak ke udah nyukung tim Barracuda nyentuk ke datai ba tikas ke diatu.
Iya madah udah sedia mai tim Barracuda bepekit ba pekit bukai ke lebih besai.

Sama datai ngemata pekit Adun Beting Maro Razaili Gapor enggau bini iya.