KUCHING: Kaban Parlimen (MP) Selangau Baru Bian enda ulih ngulu Aum Parlimen keterubah dibaruh iring Menteri Besai Datuk Seri Ismail Sabri Yaakob beduduk ari iya kena rampit Covid-19.
Iya madah diri ditemu positif Covid-19 kena 10 September tadi nengah peresa RT-PCR mandatori tiga hari sebedau aum Parlimen.
“Aku dipinta kuarantin nyentuk 21 September 2021, nyadi aku enda ulih ngulu aum Parlimen nyentuk abis kuarantin,” ku iya madah nengah sebengkah penerang, kemari.
Baru ke mega Adun Ba’Kelalan madah diri bisi kelai sakit nya baka renga enggau tabin kena 10 September lalu diau udah beinsur gerai.
Taja pia, iya pechaya vaksinasyen ke diterima iya beberapa bulan ke udah udah mantu tubuh iya ngelaban penyakit nya ari nyadi raya, baka sampai masuk sepital.
Nya alai, Baru meransang mensia mayuh ke apin nerima tuchuk vaksin anang enggai betuchuk laban nya ulih nyelamatka nyawa,” ku iya.
