Batu Gong di Ulu Katibas kelai tulung Orang Panggau

KUCHING: Pendiau batu nya tuchi baka tawak iya nya sebagi ari kereban main asal kitai Iban, kelia Batu Gong dikangau Batu Bedawak tauka Tawak.

Diau ba Ulu Sungai Katibas, Song, Batu Gong ngempu cherita lama iya nya cherita siku Remaung ngelaban bujang berani Iban ti benama Bungai Nuing.

Michael Kulin, 55 peranak ari Sungai Tekalit, Song madah kebendar batu nya belubang.

“Jerita sida tuai madah batu nya ditejal Bungai Nuing ngena batu laban iya enggai meda Remaung pansut makai mensia.

“Mensia ti ditangkap Remaung deka dibai iya tama ke dalam lubang batu nya, ngujungka Bungai Nuing nejal lubang nya ngena batu bukai,” ku iya.

Batu Gong baka tawak kereban main asal bansa Iban.

Tambah iya, kediatu batu nya mengkang dia nyadi sebagi ari palan narit ati laban sebaka gamal enggau sebuah tawak kelimpah sungai ti manah dipeda.

“Diatu Batu Gong mengkang dipeda ngambika nyadi pengingat anak-anak jemah laban cherita nya tetap nyadi buah kenang bansa Iban kandang menua,” ku iya.

Ketegal ditampal enggau batu bukai, lubang Batu Gong bisi ngembul enda nyalah baka pendiau tawak.

Bisi mega cherita bukai madahka bansa Iban ti diau ba Sungai Katibas enda tan ati dikachau Remaung ngujungka sida minta tulung Bungai Nuing ti diau ba Panggau Libau.

Nitih ka penemu bansa Iban, Pangau Libau endang semina diuan sida ti sigat, landik enggau ngembuan penemu.

Bungai Nuing ngelaban Remaung pengelama tiga hari tiga malam tang nadai siku entara seduai alah tauka menang ngujungka Bungai Nuing bulih siti akal ngalahka Remaung.

Ku cherita, Bungai Nuing ngaga diri mulai pulai baka ti alah enggau Remaung tang kebendar iya belalai ba baruh batu nya laban iya nganti Remaung tama ke dalam lubang batu nya tadi.

Pengudah Remaung tama ngagai Batu Gong, Bungai Nuing lalu begaut keluar sereta ngambi batu ba Sungai Katibas lalu digaga iya nyadi segala.

Udahnya, batu ti segala nya lalu ditampal iya ngagai lubang Batu Gong endur Remaung diau.

Remaung pan lalu parai dalam Batu Gong laban enda ulih pansut, bansa Iban ti diau ba kandang Sungai Katibas idup likun sereta enda takut agi ngagai Remaung ti ngachau sida ngiga pemakai di kampung enggau sungai ti ngembuan mayuh ikan.

Batu Gong tu sebagi ari cherita lama tuai kelia ti meruan dikingat agi tuchi bansa kitai Iban kelebih agi sida ti agi megai pengarap animesme tauka pagan sereta pengawa miring laban bisi maya palan baka tu deka dibiau endur minta semengat enggau pekara bukai.

Michael Kulin ngambi gambar kenang ba mua Batu Gong.