KUCHING: Pengerami Bazar Gawai Dayak deka dilanggur awak ulih dipasuk dalam kalinda dagang temuai menua.
Sapit Premier Sarawak ti mega Penyanding Penemu Komiti Pengawa Gawai Dayak 2023 Datuk Amar Douglas Uggah Embas madah, sida deka berandau mantaika perambu tu ngagai Menteri Dagang Temuai Nengeri (Menteri Dagang Temuai, Industri Kreatif enggau Seni Pemerindang Datuk Seri Abdul Karim Rahman Hamzah) enggau Menteri Dagang Temuai Perintah Besai (Menteri Dagang Temuai, Seni enggau Budaya Datuk Sri Tiong King Sing) ngambi pengawa nya ulih mujur.

“Tambah mega, Pengerami Gawai endang udah dipasuk dalam kalinda dagang temuai menua.
“Tu semina sebagi ari pengerami nya, nyengkaum program Niti Daun ti mandangka penyerakup enggau penyelai Sarawak dalam Malaysia,” ku iya.
Uggah bejaku munyi nya rambau aum pemberita pengudah bejadika Bazar Gawai Dayak 2023 ba padang Majlis Bandaraya Kuching Selatan (MBKS) ditu, malam ensanus.
Ku iya, Bazar Gawai Dayak engkeman enggau manah dikena mantaika produk Dayak ngagai menua luar kelebih agi baka kraf jari enggau dagang pemakai.
Dulu ari nya, iya madah, Bazar Gawai Dayak 2023 diatur beserimbai enggau Pengerami Gawai Dayak Renggat Sarawak 2023 ti berengkah diatur kena 16 nyentuk 25 June.
“Pengawa tu berengkah ari pukul 5 lemai nyentuk 11 malam berengkah Hari Satu nyentuk Hari Lima seraya kena Hari Enam enggau Hari Minggu sida deka berengkah ari pukul 10 pagi nyentuk pukul 11 malam.
“Bemacham program diatur dikena ngerichahka agi Bazar Gawai Dayak.
“Tu nyengkaum Malam Seni Raban Bansa Dayak dipandang raban bansa Orang Ulu kena 19 June, raban bansa Bidayuh kena 20 June enggau raban bansa Iban kena 21 June.
“Bisi mega diatur Pekit Kumang enggau Keling, Gawai Idol, beperindang enggau penanyi tebilang sereta live band.
“Pengawa nutup Bazar Gawai Dayak tauka Ngiling Bidai deka diatur kena 25 June 2023.
“Nya alai, mensia mayuh ditesau sampal datai sama berami kelimpah sama besaup nyungkak ekonomi rayat kitai,” ku iya.






