SEREMBAN: Dara asal Limbang, Sarawak, Beatricia Erwina Johny, 25, nurai sejarah kediri empu pengudah dipadu nyadi Ratu Etnik Dayak Negeri Sembilan 2025.
Penyulut nya bukti pengeransing iya ngangkat budaya Dayak ngagai tikas ti tinggi agi ngambi dikelala semua orang kelebih agi di luar Sarawak.
Peneleba enggau pengandal besai dikembuan anak tuai ari tiga menyadi nya tebantai lebuh iya mujur ngalahka lebih ari empat pemekit bukai ti datai ari bemacham penatai.
Berebak enggau penyulut nya ti diatur serimbai Pengerami Makai Lemai Mantar Gawai ti diatur di Hotel Klana, iya mujur mai pulai perais mata duit sepenyampau RM1,500.
Iya ti gawa ba siti serikat peribit sereta chakah bejalaika pengawa nyadi model nyambil di Johor Bahru madah ke iya beterima kasih ngagai semua orang ti nyukung pejalai pengidup iya.
“Penyulut tu chukup besai reti ba aku lalu tu ukai penyulut aku kediri tang tu penyulut semua komuniti Dayak ti kaya enggau pesaka adat enggau main asal.
“Aku ngarap tu ulih nyadi inspirasyen ngagai rebak biak dikena ngangkat pesaka budaya kitai,” ku iya.
Dunya pekit kumang ukai pekara baru ba Beatricia laban iya kala masuk bemacham pekit kumang sebedau tu sereta mayuh bulih anugerah.
Nya nyengkaum Pekit Kumang Johor 2022 ti mujur menggi gela Kumang, penuduk kelima ba Pekit Kumang RNI Renggat Nengeri Sarawak 2022, penuduk kedua ba Pekit Dewi Kebaya Kota Selatan 2023 enggau penuduk ketiga ba Pekit Miss Beauty Johor 2023.
Peneleba nya mantu mandangka agi tikas pengulih iya ba Pekit Ratu Etnik Dayak Negeri Sembilan 2025 ti mujur ngerebut penuduk champion ba pekit nya.
Nangkan nya, penuduk kedua ba pekit nya dipenggi Ella Apit ari Kapit, Sarawak lalu penuduk ketiga diempu Cordelia Emily ti bela datai ari Limbang.
Ba pekit nya, seduai mujur mandangka pemintar seduai enggau penyelai pesaka budaya Dayak ti narit ati bala akim.
Ungkup penerang, pekit nya keterubah diatur Gerempung Raban Indu Dayak Seremban nengah kerejasama Perintah Negeri Sembilan.
Menteri Besai Negeri Sembilan, Datuk Seri Aminuddin Harun diberi basa bejadi pengerami makai lemai enggau pekit nya.
Pengari raban pengatur madah, pekit nya diatur dikena mandang penyelai budaya Dayak ngagai mensia mayuh kelebih agi di Semenanjung Malaysia.
