Bejimat deriba, penatai kita dianti

KUCHING: Taja tinggal sehari deka ngintu Hari Gawai Dayak mensia mayuh dipinta bejimat maya deriba pulai ke menua.

Suara Sarawak bisi limpang nanya penemu sekeda raban bansa Dayak ti benung kiruh bebelika barang dikena ngintu Gawai Dayak, kemari.

Sonia Gobin, 28 taun, bansa Bidayuh ngelalau anang enda bejimat maya deriba entukar jam diatu laban jalai sekut.

“Minta semua sama beratika pengelikun lebuh deriba kelebih agi anang rindang bemain telefon.

“Pia mega, enti ngasaika diri udah ngelu pala ngirup ai bisa tau anang bebaika kerita, tinduk dulu nganti diri udah gerai baru nampung pejalai pulai ke menua.

Sonia Gobin

“Kingat dulu pengelikun diri enggau orang dikesayau kitai,” ku iya seraya madahka iya pulai ke Kampung Bokah Bau ngintu Gawai.

Penemu Sonia disukung Goodson Kui, 48 taun ti deka ngintu Gawai di Padawan.

“Enti kitai mabuk, tau bai tinduk. Pia mega sida ti berasai ngantuk maya deriba, tau ngetu dulu sebelah tisi jalai ti likun, belelak dulu muai kantuk.

“Giga endur ti likun baka pak kupi, stesyen ngisi minyak tauka ngetu ba pasar dulu belelak enda lama sebedau nampung pejalai,” ku iya mansutka penemu diri.

Seraya Eilin Jubang, 24 taun nangkan sida ti betengahka jalai alun berundingka pengelikun penguna bukai.

Goodson Kui enggau anak iya

“Aku pagila pulai ke Betong ngintu Gawai enggau apai indai di menua nepan bas.

“Ngarapka deriba bas mega bela ulih beratika pekara tu laban pengelikun kami ti nepan bas bepanggai ba iya (deriba bas).

“Anang ngemai bas kelalu laju, ngelui ari pengelaju dikemendar, kelebih agi malam hari.

“Kitai suah ninga sebana jalai mayuh belubang sereta rusak berindik ari pengawa ngaga jalai besai Pan Borneo,” ku iya madah nyemetak.

Nangkan nya ku Eurice Gejet, 27 taun, orang ti nepan perengka pengangkut mega patut beratika tanggungpengawa diri.

“Anang kelalu ngandal sereta neju orang ti deriba laban sida mega nyangka lelak tauka ngantuk maya derita.

“Enti ulih bai berandau ngambika sida enda berasai ngantuk tauka sunyi.

“Lalu enti bisi orang bukai nemu deriba tau besilih ngambi enda entu lelak kelebih agi menua jauh,” ku iya.

Eurice mega nangkan sida ti deka pulai ke menua nentuka pengelikun entukar ti dikena baka meresa tayar enggau minyak dikena nyeliah penusah bukai nyadi.

“Enti ulih sebedau mupuk, anjung dulu entukar kitai ngagai palan servis ngambika entukar dikena kitai nya likun,” ku iya seraya nambah, semua pejalai kitai mindah likun sereta datai ba menua ditapat.

 

Eilin Jubang

 

Eurice Gejet