KUCHING: Peneleba ngadu dokumentasyen lebih 900 ramuan herba asal sereta marit 150 indu ba pengawa ngintu pesaka perubat jamu di Indonesia deka dikunsi nengah program Sarawak Biodiversity Insights.

Program diatur Palan Biodiversiti Sarawak (SBC) kena 5 November nya deka mai Pemungkal enggau Chairperson Yayasan Scofindo Conservation, Luluk Ida Williams, ti regas ngintu utai tumbuh ubat, ngimpun penemu perubat asal sereta negapka komuniti di Indonesia.

Ku penerang SBC, sesyen ngena pejuluk JAMU – Perubat Herba Asal Indonesia: Penerang Jamu Saintifik, Pelajar Komuniti enggau Penegap nya deka bekunsi chara saintifik nyediaka ramuan herba.

Sesyen nya mega deka nambhaka penemu bekaul pemesai guna ngimpun enggau nyaga penemu perubat asal.

“Nengah Yayasan Scofindo Conservation, Luluk ti ngemudika mayuh inisiatif ti ngempung pengawa ngintu utai tumbuh ubat enggau pelajar komuniti dikena ngerembaika penemu bekaul guna herba asal.

“Naka diatu, yayasan nya udah ngaduka dokumentasyen lebih 900 ramuan herba asal enggau marit lebih 150 indu ba mayuh pengawa bepelasarka komuniti,” ku penerang nya.

Entara inisiatif ti dipejalai nyengkaum meransang pengawa nanam utai tumbuh ubat diri sebilik nengah program Utai Tanam Ubat Diri Sebilik (TOGA), kelimpah ari meri latih bekaul chara ngaga jamu ke beratika pekara pemeresi.

Pengawa nya bela ngajar chara ngaga isi herba bepelasarka penemu sains ti dikemansangka perintah, ari ngena kereban ti diseraris sereta sukat ti ditetapka dikena nentuka asil ti konsisten agi.

Ku SBC, pengawa bekunsi penemu nya deka meri peluang ngagai penyetera mereti ke baka ni penemu perubat asal ulih digempung enggau chara saintifik dikena meransang pengawa bekenaka utai tumbuh ubat ngena chara bisi tanggungpengawa.

“Program tu bela nerangka tangkup pengawa komuniti, kelebih agi indu, ba pengawa ngimpun penemu perubat asal sereta ngemansangka pengelandik bekaul pengawa nanam enggau ngena utai tumbuh ubat.

“Kelimpah ari nya, bala penyetera deka diberi penerang bekaul pemesai guna ngintu pengelain utai tumbuh ubat enggau nyaga penemu asal ngambi pesaka tu dikenang enggau disubur rebak dudi.

“Sesyen bekunsi penemu nerima penatai mensia mayuh nya diatur Hari Empat, 5 November, pukul 2 lemai ngena tali arus nengah Zoom lalu deka dipanchar terus ba Facebook,” ku penerang nya.

Nambhaka nya, bala penyetera tau ngambi bagi nengah Zoom ti nadai bebayar, tang ditatak 300 penyetera aja.

Mensia mayuh tau media program nya dipanchar terus nengah Facebook SBC.

“Program tu bela nyediaka sesyen tanya saut tekala nya ngambi bala penyetera ulih berandau enggau pengelicha.

“Mensia mayuh ti deka ngulihka penerang silik tau telefon ngagai SBC nengah lumur 082-610610,” ku iya.