KOTA SAMARAHAN: Projek ngaga Palan Riman Sarawak dipelaba berengkah Januari 2027 pengudah kunteriktor ti mujur nerima Surat Setuju Nerima (SST).

Menteri Kereja Raya, Datuk Seri Alexander Nanta Linggi madah, proses sebedau diberi pemendar projek nya diatu udah tembu diadu.

Ku iya, kompeni ti dipilih udah ngulu randau meri penerang dikena nyendiaka diri nganjung tinda bagi langkar enggau pengawa ngaga sepital projek nya.

“Randau meri penerang nya beguna dikena nentuka semua kompeni ti ngaga bida ngulihka penerang silik pasal skop projek ngambi sida ulih nganjung perambu pemadu manah nitih atur ti udah ditetap.

“Proses meresa tinda dipelaba tembu urung bulan Oktober taun tu sebedau kunteriktor ti mujur dipilih dipadah endur opis menteri SST pun taun baru,” ku iya.

Nanta bejaku munyi nya ba aum pemberita pengudah ngabas taba projek Palan Riman Sarawak ari ringkat semilan begunan Palan Tungkul Atau Sarawak ditu, kemari.

Ku iya, kunteriktor ti udah dichiri deka diberi timpuh 60 bulan tauka lima taun ngaga tembu projek nya, ti lalu ditangkan enggau timpuh Defect Liability Period (DLP) sepengelama dua taun.

Iya madah baru, enti projek nya bejalai nitih timpuh ti udah ditetapka, sepital nya ila disadang tembu dalam taun 2032 lalu ulih berengkah beoperasyen dalam timpuh DLP.

“Palan Riman Sarawak tu ila deka digaga ba tanah pemesai 27 ekar ti bepalan ba sepiak Palan Tungkul Atau Sarawak di Kota Samarahan.

“Palan tu ila deka ngembuan kapasiti 310 katil sereta nyendiaka fasiliti berubat pesakit pulai hari enggau pesakit berubat khas ungkup pesakit riman,” ku iya.
Ngenang bekaul langkar palan nya, iya madah ke Opis Menteri Pengerai udah netapka skop enggau peminta nengah penerang, lalu langkar kepenudi bepanggai ba perambu genap kompeni ti nganjung tinda.

Iya madah, semua ungkus projek nya dipelaba deka ngelui ari RM1 bilion, tang penyampau kebendar semina deka dipejurai pengudah proses tinda tembu laban nya bepanggai ba langkar enggau perambu ti dibantai.

“Perintah Sarawak udah ngungkupka belanja sepenyampau RM1 bilion dikena bejalaika projek nya (bayar dulu, Perintah Besai mayar pulai), tang semua ungkus dipelaba ngelui ari penyampau nya,” ku iya.

Ku iya, pengawa bejalaika projek nya deka dipatau Opis Kereja Raya (JKR) Malaysia, lalu iya ngarapka kunteriktor ti dipilih deka ulih bejalaika tanggungpengawa enggau naka pemanah.

Nanta mega madah, Palan Riman Sarawak tu ila dikearap nyadi palan moden ti disikap ngena perengka perubat pemadu baru dikena ngangkatka pemanah pengawa berubat pesakit riman di nengeri tu.