Belanja pejalai ditanggung Perintah S’wak

KUCHING: Perintah Sarawak udah setuju deka nyendiaka bantu belanja pejalai bala menyadi dua soldadu ti lenyau ba operasyen di Pulau Perak, Koperal David Edmund Rapi enggau Koperal Moses Logers.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madahka bantu tu deka diberi nengah Unit Pengelikun enggau Rumah Sarawak.

“Tang sebedau nya, kitai deka nganjung surat dulu ngagai Raban Soldadu Malaysia (ATM) sebedau ngatur belanja pejalai sida ke Langkawi.

“Kebuah pia laban sida tiga tu minta berandau enggau piak ti ngempu tanggungpengawa ngiga menyadi sida ti lenyau nya,” ku iya nerang.

Fatimah mansutka jaku nya pengudah nerima penemuai basa ari bala menyadi Koperal David Edmund Rapi enggau Koperal Moses Logers ba Bengunan Baitul Makmur ditu tadi.

NERANG… Fatimah nyaut tanya bala pemberita pengudah nerima penemuai basa ari kaban belayan Koperal David Edmund Rapi enggau Koperal Moses Logers ba Bengunan Baitul Makmur ditu, kemari. GAMBAR NADIM BOKHARI.

Sida tiga tu iya nya James Mathew Logers, 31 taun, menyadi lelaki lumur dua Moses, Thony Hilo Logers, 34 taun, menyadi lelaki tuai Moses enggau Morni Edmund Rapi, 44 taun, menyadi lelaki lumur dua David.

Ku Fatimah, entara belanja pejalai ti deka ditanggung Perintah Sarawak baka tambang bilun, bayar endur diau, belanja makai enggau pekara bekaul bukai ti patut maya sida din.

“Diatu kitai semina ngarapka piak ATM ulih ngemai sida tiga tu bela nyereta operasyen ngiga seduai ti lenyau.

“Kitai diatu agi nganti Unit Pengelikun Nengeri netapka haribulan sereta ngatur randau enggau piak ti patut.

“Sampi kitai ngarapka semua pengawa ti deka diatur deka bejalai enggau lanchar sereta mujur,” ku iya.

Apin lama, kaban belayan David enggau Moses madahka diri berasai asa sereta enda lantang ati meda raban ATM nadai meri penerang silik pasal operasyen ngiga enggau nyelamat (SAR) ti dipejalai lalu udah diketu diatu.

AGI ANDAL… James Mathew Logers (dua kanan), Thony Hilo Logers (tiga kanan) enggau Morni Edmund Rapi (dua kiba) nemuai seraya minta bantu Fatimah pasal pengelenyau menyadi sida. GAMBAR NADIM BOKHARI.

Suara Sarawak