Belantak lalu angus

KUCHING: Dua buah kerita retung pengudah belantak lalu hangus ba simpang lampu trafik Jalai Stutong, BDC ditu, dini hari tadi.

Taja pia ku Pemesai Bomba Kanan II ari Opis Bomba enggau Penyah Penusah (BBP) Tabuan Jaya, Chaplin Wan, kededua deriba kerita Perodua Myvi enggau Viva mujur mansutka diri sebedau kerita nya angus lengis.

“Kitai nerima kangau ngenyit urung pukul 2.10 pagi lalu berumban ngesah ngagai endur penusah nyadi.

“Lebuh datai dia, kami meda dua buah kerita bansa Perodua Myvi enggau Perodua Viva nyauka angus 100 peratus tang kededua deriba mujur nyelamatka diri,” ku iya nengah sebengkah penerang.

Pia mega ku iya, sebedau kerita seduai angus, kerita nya dulu belantak.

“Lapan kaban Bomba dianjung ngesah penusah nya lalu kitai ngena sebuah Fire Rescue Tender (FRT).

“Kereja ngerara enggau madamka api ngena dua chara lalu api mujur dipadam urung pukul 2.34 pagi,” ku iya.

Ku iya, nadai penusah bebadi nyawa diripot nyadi lalu operasyen tembu urung pukul 2.39 pagi.

MERESA… Polis nulis ripot pasal penusah angus dua buah kerita ke belantak ditu dini hari tadi.