Belayaka lanting bilik tuai

SIBU: Lanting mai reti reta tengkira baka tanah temuda, kebun enggau keresa lama bukai bilik tuai.

Ku Tuai Rumah Akul Dagang, lanting tu pemai apai indai lebuh seduai bebagika reta enggau bala anak.

“Lanting dikumbai kitai ungkup pemisi tauka agih reta tengkira dibai ari bilik tuai ungkup siku-siku.

“Iya mega tau dikumbai pemai ari pengangkat kitai kelebih agi maya belaki tauka bebini nguai, nama bilik entua,” terang iya lebuh dirandau Suara Sarawak.

Serak tu Tuai Rumah Akul mai kitai ngenang senentang sekeda raban bansa Dayak Iban ke suah belaya enggau diri sebilik maya bebagika reta tengkira.

LANTING… Tanah temuda entara lanting ti suah diperebut lebuh bebagika reta bilik tuai.

Ku iya, tu nyengkaum bebagika kebun, senapang, rumah, tanah pesaka enggau utai bukai ke bisi dalam bilik ditinggalka apai indai kelebih agi sida ke nampung bilik tuai.

“Utai tu suah agi nyadi maya apai enggau indai udah nadai tauka maya apai indai udah tuai sereta enda ulih bekereja agi lalu diibun anak ke diambu ngibun seduai.

“Enti anak mayuh, barang sapa ke nyanggup deka ngibun apai indai nya mih ke ngempu reta tengkira lebih agi ari bala anak bukai.

“Taja pia, bisi sekeda apai indai endang udah ditaga ke ngagai siku-siku anak laban nemu diri empu nyau enda dapat lalu enggaika anak sida belayaka lanting nya,” ku iya nerang silik.

Tambah mega dunya diatu jauh udah berubah lalu bala anak nyau enda nyemilik apai indai di rumah panjai, mindah ke mengeri besai nitihka periuk asi.

ATUR MANAH… Tuai Rumah Akul Dagang

Ari nya, apai indai nyau jarang amat magi reti tengkira ngagai bala anak sida lalu semina ngagai anak ke enggau sebilik, ke nampung bilik nya ila.

“Ku sekeda penemu, apai indai enggai meda anak sida beserara diri menyadi enti udah bebagika lanting.

“Sekeda apai indai enda nyagi bala anak sida kediri tauka ngentak rumah kediri. Utai dikedeka sida, lebuh bala anak pulai kemisi ke menua, endang deka napatka bilik tuai nya.

“Bisi mega anak ke enda diasuh ngugi tauka nguai ke orang baikka iya nya anak indu tauka lelaki. Semua anak endang diasuh ngibun bilik, nangika reta pambar.

“Engka ketegal nya apai indai enda magi reta tengkira ngagai anak maya sida agi idup. Tang pekara tu deka mai penyarut ngagai bala anak laban berebutka lanting nya.

PUN PENGIDUP… Apai indai rindu agi diau di rumah panjai ari dibai anak ke mengeri.

Kitai mega bela nemu kemaya hari tu anak ke bisi pemandai sigi enda diau di rumah panjai. Semua sida tu deka ngidupka diri sebelah mengeri besai lalu meli rumah sereta bebelika reta tengkira kediri empu.

“Kira sida ngentapka pendiau di mengeri, jauh ari apai indai enggau bala menyadi bukai sereta jarang pulai ke menua enti nadai kebuah berat.

“Semina anak ke kurang pemandai tauka nadai entu batang pengawa ke enda ulih gawa di mengeri aja ke ngibun bilik ngereja pengawa umai, bekebun di rumah panjai.

“Ari gaya perati aku, apai indai sigi enggai dibai anak diau di mengeri, ambis sida iya ulih lama diau di mengeri seminggu dua aja laban pengidup sida sigi ba rumah panjai.

“Taja pia, bisi mega sekeda anak diau jauh di mengeri sigi meruan ingatka menua enggau rumah panjai diri empu.

KERESA TUAI… Sekeda ari tajau suah nyadi pemai lebuhka angkat ari bilik diri nyemilik entua.

“Sida agi bekirumka belanja ngagai apai indai di rumah panjai, nyaup bala menyadi ke diau di rumah panjai sereta sama-sama ngemansangka pendiau di rumah panjai,” ku iya nambah.

Nya alai ba penemu iya, nya kebuah apai indai enda terunding deka magi reta tengkira ngagai bala anak.

Anak ke gawa di mengeri mega endang disema baka orang ke bejalai ngiga pengidup ba menua bukai.

“Enti kelia raban bansa Iban tebilang rita bejalai sampai ngagai Brunei, Miri, Sabah enggau menua bukai.

“Bekereja bekuli ba menua orang, ngulihka duit ringgit, pulai mai pengeraja ngambika bisi digagaka apai indai ke diau di menua.

“Tang dunya diatu udah jauh berubah, ari segang pemansang baka jalai alun enggau ke bukai. Orang munya manggai betaun endur mulaika diri, bisi sekeda lalu diau mendam ba menua orang.

“Diatu, pekara pemadu beguna ke patut diadu kitai ke nyadi apai indai iya nya magi reta nitihka lebas enggaika bala anak belaya dudi hari.

“Tambah mega, kitai diri menyadi sigi enda ulih begulai sebilik selama-lama laban bela bisi pengidup enggau ngatur ruang bilik sida empu.

“Udah tentu mega genap iku kitai ke ngidupka diri deka nirika rumah tangga, bisi ruang bilik kediri empu.

“Datai ba maya baka tu mih laya tau ulih nyadi entara diri sebilik kelebih agi enti begulai serumah, saum perabung,” tandu iya.

Naka ke udah diperati aku sekumbang ke nyadi ketuai ba rumah panjai, diri menyadi sigi ulih begulai enggau pangan diri tang ipar enggau bala anak enda.

Nya mih kebuah apai indai patut ngatur lanting sida ngambikka bala anak enda belaya enggau pangan diri.

Baka nya mega anak ke tuai patut bepikir utai ti baka tu, ngambikka enda charut dudi hari, ku Tuai Rumah Akul nyimpul randau.