Beri peluang ngagai anak OKU

“Penau sida ba lumba enggau main ulih dikerembai ngagai tikas entarabansa baka ba lumba olahraga, badminton, chatur, nyemerai enggau ke bukai.”

KOTA SAMARAHAN: Urung 1,706 iku Orang Nyelai Pendiau (OKU) udah direjister ba Samarahan, ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah.

Iya madah rikod tu nyengkaum sida ti bisi penanggul belajar, fizikal, buta, benggal, bisu enggau ke bukai.

“Enti kelia kitai nadai nemu baka ni ngemujurka sida ti OKU kelimpah nyaga sida ba rumah aja sereta nadai nerima nama-nama bantu ari perintah.

“Tang diatu enda baka nya agi laban taun tu aja kenyau Januari ngagai April perintah udah ngeluarka ungkus RM67.3 juta bantu ngagai OKU,” ku iya.

Fatimah bejaku munyi nya maya ngulu Pengerami Penutup Orang Nyelai Pendiau (OKU) Got Talent ba sebuah palan bebeli barang ditu, kemari.

Ku iya, anak OKU patut diberi peluang dalam program, lumba enggau main.

“Penau sida ba lumba enggau main ulih dikerembai ngagai tikas entarabansa baka ba lumba olahraga, badminton, chatur, nyemerai enggau ke bukai.

“Tu ulih dipeda lebuh Sarawak nyadi champion 13 kali ba Para sukma.

“Nya alai aku ngarapka kitai anang ngembuan ulah nutup pintu ngagai bala OKU tu laban sida mega bisi pengelebih,” ku iya.

Fatimah ngarapka apai indai nembiak OKU seruran meri sukung sereta enda putus pengarap meransang anak sida ngulu nama-nama aktiviti ti bisi diatur.

Sama datai Kaban Parlimen Kota Samarahan Rubiah Wang, bala komiti, bala penyereta enggau mensia mayuh.

LANDIK BELAGU…Datuk Sri Fatimah Abdullah meri perais ngagai champion belagu OKU Got Talent ditu, kemari.