Beri sukung ngagai KM

Tu dikena nentuka nengeri tu terus dipegai parti ari menua tu empu

“Kitai enggai nengeri tu dipegai PH laban agenda politik PH semina pintar bejaku aja. Sehari tu bejaku lain, pagila bejaku lain.”

SIBU: Semua rayat Sarawak diperansang bela nyukung iring Kepala Menteri (KM) Datuk Patinggi Abang Johari Tun Openg ngambika iya terus ngatur nengeri tu jemah.

Presiden Parti Progresif Demokratik (PDP) Datuk Seri Tiong King Sing madahka Abang Johari ti nyadi Chairman Gempung Parti Sarawak (GPS) begunaka sukung teguh ari rayat Sarawak maya Pengawa Bepilih Nengeri (PRN) ke deka datai dikena nentuka nengeri tu dipegai parti menua tu empu.

“Sarawak jauh tinggal dibanding Semenanjung Malaysia ke diatu dipegai Pakatan Harapan (PH) ba renggat perintah besai.

“Kitai enggai nengeri tu dipegai PH laban agenda politik PH semina pintar bejaku aja. Sehari tu bejaku lain, pagila bejaku lain.

KELAI BASA… Tiong betabi enggau mensia mayuh ti ngulu pengerami nya.

“Anang kitai alah ditipu politik PH ti enda manah baka politik GPS ti negika nengeri tu nyengkaum hak rayat Sarawak,” ku iya rambau ngulu Pengerami Ketuai Begulai Enggau Rayat di Rumah Anthony Philip, Bawang Assan, ditu lemai ensanus.

Sama datai Sapit Naib Presiden PDP Kaunselor Teo Boon Siew, Ketuai Nembiak PDP Robert Ayu, Ketuai Indu PDP Datuk Chiew Yen Chew, Tuai Rumah Anthony sereta bala ketuai GPS ke bukai.

Urung 1,000 iku bala penyukung GPS ngulu pengerami ti diatur PDP Pampang Wilayah Tengah.

Tiong madahka PH mayuh mantaika penanggul ti enda patut sereta enda meri empas manah ngagai Sarawak tang semina meri penusah ngagai kitai.

“Kitai patut beratika pengawa dikereja Abang Johari nengah GPS ti mayuh meri pemaik ngagai rayat ba nengeri tu.

“Tang, PH tu semina ngemeratka Semenanjung Malaysia enti dibanding Sarawak”ku iya.

Nya kebuah, iya nesau peranak ba Bawang Assan meri sukung tegut ngagai GPS maya PRN ke deka datai nentuka nasip anak, uchu enggau ichit sida dijaga manah.

“Nya alai, anang ngasuh PH ngerampas Sarawak laban kitai ulih beratika pekara ti nyadi ba pekara politik enggau pemerintah PH diatu.

“Kitai patut ngetan pemerintah dipegai Abang Johari enggau GPS di Sarawak. Nadai parti bukai ulih negika nasip anak Sarawak kelimpah ari parti kitai empu,” ku iya nambah.

Tiong madahka GPS mayuh nyelinting pemansang menua pesisir ti ulih meri pengelantang ngagai peranak dia.

Nambahka nya ku iya, Abang Johari enggau naka ulih ngemansang sitak menua pesisir ba nengeri tu enda ngira bajet tauka agih belanja ungkup pengelantang rayat.

“Aku ngarapka Bawang Assan tu ulih berubah enggau meri undi besai ngagai GPS maya PRN ke deka datai.

” Enda ngira sapa chalun iya maya PRN tu ila, Bawang Assan tu kerusi diempu GPS lalu ukai diempu parti bukai kelimpah ari GPS,” ku iya nampung.