Berita surat kabar mengkang dipilih mensia mayuh

“Ba berita ti ngasuh charut tu, mensia mayuh begunaka penerang ti betul baka media laban ripot nya bempu tanggungpengawa.”

KUCHING: Berita ari media baka surat kabar Suara Sarawak mengkang dipilih mensia mayuh ngulihka penerang ke betul lebuh bisi penyarut politik ti nyadi, apin lama ke udah.

Menteri ba Opis Kepala Menteri (Integriti enggau Ombudsman) Datuk Talib Zulpilip madah, penyarut politik ba Perintah Besai ngasuh mensia mayuh saru penemu kelimpah begunaka penerang ti betul ngambi nemu sebarang berita pemadu baru sentang pekara nya.

“Apin lama, nama chalun Menteri Besai kelapan betukar, bisi madah Anwar (Ketuai Pakatan Harapan-PH) tauka Mahathir (ex-Menteri Besai, Tun Dr Mahathir Mohamad) lalu kepenudi iya, Tan Sri Muhyiddin Yasin.

“Ba berita ti ngasuh charut tu, mensia mayuh begunaka penerang ti betul baka media laban ripot nya bempu tanggungpengawa,” ku iya.

Iya mansutka jaku nya lebuh bejaku ngarika Kepala Menteri Datuk Patinggi Abang Johari Tun Openg beserimbai enggau Pengerami Makai Taun Keterubah Surat Kabar Suara Sarawak ba sebuah hotel tebilang, ditu malam tadi.

Bisi mega diatur pengawa ngelanchar e-paper Suara Sarawak enggau surat kabar begulai, New Sarawak Tribune.

Terang Talib, pengudah Menteri Besai kelapan angkat sumpah ensanus, berita bula agi ngerembai sebelah media rama ti madahka kemari kemisi.

“Tang nya semina berita bula enggau chukup kitai ngerami aja, nibuh kemisi.

“Nambahka nya, media baka surat kabar Suara Sarawak chakah ngiarka berita bula baka nya,” terang iya.

Talib nyemetak madah, mensia mayuh mega begunaka berita ti engkeman lebuh nyadi mata enggau pending ngagai perintah.

“Ripot ke manah deka nempa bansa ukai nya berita bula ke tau ngasuh orang bukai charut.

“Nya kebuah, mensia mayuh begunaka media ti ngembuan tanggungpengawa ba semua ripot sida,” terang iya.

Berebak enggau nya, Talib ngarapka surat kabar Suara Sarawak mansang nyadi sebuah organisasyen ke alai diatu bisi 109 staf.

Ku iya, pemansang surat kabar Suara Sarawak deka meri peluang gawa ngagai nembiak ba menua tu.

Sama datai Menteri Muda ba Opis Kepala Menteri (Pekara islam enggau Dewan Bandaraya Kuching Utara (DBKU) Datuk Abdul Rahman Junaidi, Menteri Muda Pemansang Palan Penyangkai Kapal enggau Infrastruktur, Datuk Julaihi Narawi sereta Ketuai Pemesai Eksekutif SV News Sdn. Bhd, Dr. Jeniri Amir.

Suara Sarawak