KUCHING: ‘Besampi ke pemujur kami awakka datai din selamat’ pia ku leka sampi ke dikunsika jaguh terejun menua Pandelela Rinong di media rama iya sebedau bekejang ke Tokyo, Jepun begulai enggau 18 iku atlit bukai, ensana.
Leka jaku ke diKunsika iya nya nerima timbal ti positif ari penyukung ti besampika pemujur iya ngangkatka nama menua di Lumba Olimpik, Tokyo 2020 kena 23 Julai tu.
Champion midul emas dalam lumba 10 meter (m) individu ba Pekit Piala Dunya Terjun FINA, Tokyo bulan Mei nya mega enda sabar datai kin baru dalam misyen iya muru midul emas pekit Lumba Olimpik tu.
“Aku chukup gagit terebai baru ke Tokyo ungkup nyapai misyen baru ba pekit Lumba Olimpik.
“Besampika pengelikun enggau pengerai kami sereta pemujur semua atlit nyapai misyen diri empu,” ku iya dalam siti video ti dikunsi ba media rama, ensana.
Berebak enggau nya, sepenyampau 18 iku atlit enggau 13 jurulatih udah bekejang ke Tokyo dalam misyen emas keterubah menua lumba nya.
Entara sida ti bekejang nengah Japan Airlines pukul 10.50 malam ensana iya nya atlit nyemerai, terjun, gimnastik, badminton enggau ‘memanah’.
Tim nya entara tim pemadu besai ari Malaysia ngusung Tokyo neruska misyen ke Lumba Olimpik 2020.
Kontinjen tu disereta semilan iku pemesai nyengkaum Sekretari Majlis Olimpik Malaysia (MOM) Datuk Naziffuddin Najib, Wong Choong Hann enggau pemesai pengerai ari Institut Lumba Menua (ISN).
Kelimpah nya, bisi 30 atlit menua dalam mayuh bengkah lumba ke alai lumba badminton nyadi atlit pemadu mayuh lebuh sida nganjung lapan iku penyereta.
Pengawa bekejang semua atlit tu mega dipenyadika Menteri Besai Tan Sri Muhyiddin Yassin.
