Besaup ngelaku VM2020

KUCHING: Kimpin Nemuai Ke Malaysia 2020 (VM2020) deka ngerembaika agi industri dagang temuai di Malaysia laban opis menteri nya nagit urung RM100 billion asil diulih ba taun 2020.

Pemesai Direktor Dagang Temuai Malaysia Datuk Musa Yusof madahka ba taun 2020, sida endang udah merambu nerima pemayuh temuai ari menua luar ti dipelaba 30 juta.

“Kami beratika raban media ari menua tu empu tauka entarabansa chakah bejalaika kimpin tu endang meri pangka ti positif.

“Lambang kimpin VM2020 tu deka dilanchar Menteri Besai Tun Dr Mahathir Mohamad kena 22 Julai,” ku iya.

Musa mansutka jaku nya ba program ‘Ilek-ilek Ngan Tourism Malaysia’ begulai enggau pemberita ditu tadi.

BESAUP GAWA… Datuk Musa Yusof (empat kiba) begambar enggau bala pemberita ba program ‘Ilek-ilek Ngan Tourism Malaysia’ enggau pemberita ditu tadi.

Ku iya, ketegal penusah besai MH370, Air Asia QZ8501 labuh ba kandang tasik Indonesia enggau MH17 ditimbak labuh pengawa dagang temuai menua bisi terjanggal.

“Kitai enggai nyadi enda belubah lebuh nya, nya kebuah berengkah ari 2017 kitai ngena peluang ngepunka baru kimpin VM.

“Dikena nyikap diri tumu, Opis Dagang Temuai nempa kaul kerejasama enggau Akedemi Seni Budaya dan Warisan Kebangsaan (Aswara) nengkebang tiun enggau leka lagu seraya mantaika penau rayat Malaysia.

“Lagu tu bisi dalam empat salin iya nya Jaku English, Jaku Melayu, instrumental aja enggau karoke (minus one),” ku iya.

Iya mega ngarapka kerejasama entara perintah enggau ejensi bukai baka Gempung ukai dikuasa perintah (NGO), sektor peribit sereta rayat bela besaup nuju nyapai juluk nasional VM2020 tu.

“Bisi lima ‘pekara nyata’ patut diasai bala temuai bisi ba VM2020 iya nya penyiru rayat, basa bala pemesai imigresyen, pemesai kastam ti kemerah enggau perengka pengangkut baka teksi enggau Grab ti meruan sereta endur sida diau baka hotel enggau ke bukai ngasuh ati lantang.

“Aku beratika menua Kuching chukup beresi lalu tu deka matak penatai temuai kelebih agi ari Singapore datai kitu,” ku iya.

Kelimpah ari ngatur kimpin, sida mega naka ulih ngerembaika dagang temuai Malaysia nengah pengawa ngelaku renggat entarabansa, mandangka pemanah rampa menua asal ari licha, ngemai media luar nemuai kitu, kimpin taktikal online enggau offline sereta kimpin media rama.

“Naka 20 June tu tadi ba media rama, Opis Dagang Temuai bisi 3.3 juta meda (follower) Facebook, 73,000 follower Instragram, 422,489 follower ba Twitter enggau 45.6 juta meda nengah Youtube.

“Nya alai, aku ngarapka sukung media Sarawak enggau media rama bukai (influencer) ditu deka nyaup Opis Menteri Dagang Temuai, Seni enggau Main Asal sereta Opis Dagang Temuai deka ngelaku enggau nentuka pemujur VM2020,” ku iya nyimpul.

Suara Sarawak