KUCHING: Karnival Jom Heboh (KJH) Sarawak Segulai Sejalai 2026, Kota Samarahan deka diatur ke 31 Julai nyentuk 2 Ogos ti deka datai.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, KJH tu deka diatur ba padang puang sepiak opis Kaunsil Mengeri Kota Samarahan (MPKS).
“Mayuh aktiviti deka diatur rambau nya ila, ari Kuching ngagai Samarahan dalam 20 minit aja, nya alai engka mayuh orang Kuching datai ke Samarahan ila.
“Pengerami tu ila deka ngerandang peluang ekonomi ngagai kedai mit, kedai makai sereta ngidupka ekonomi peranak di Kota Samarahan.
“Nya deka meri ruang enggau peluang ngagai rayat di Kota Samarahan kelebih agi raban pedaja ti bejual ba sitak nya,” ku iya.
Abdul Karim bejaku munyi nya rambau aum pemberita KJH Sarawak Segulai Sejalai 2026, Kota Samarahan ba Begunan Baitulmakmur II ditu, kemari.
Ku iya, program besai baka tu, manah dalam meri empas ngagai komuniti kelebih agi meri penerang sereta ngerapitka kaul enggau sekeda ejensi perintah ti bisi muka palan meri penerang.
“Kelimpah mai konten beperindang ngagai komuniti, program tu mega ulih mandangka ngagai mensia mayuh sekeda produk menua kitai ngagai makit ti lebih luas,” ku iya.
Dulu ari nya, Tuai Pemesai Operasyen Media Prima OMNiA, Datuk Mohd Efendi Omar madah, mayuh aktiviti deka diatur rambau KJH sekali tu.
Ku iya, nya mungkur lebih 100 chap menua enggau antarabansa ti deka dibai ngagai Kota Samarahan kelimpah ari personaliti Media Prima enggau raban artis tebilang di menua tu.
“Kami mega deka ngatur pengawa belawa bebala mayuh baka lima kilometer (km) enggau 8 km.
“Kelimpah ari nya, bisi bala artis tebilang dikangau datai baka Baby Shima, Wany Hasrita, Syamel enggau ke bukai.
“Nya alai, aku ngelaluka semua ti besemak datai bebala mayuh ngagai Kota Samarahan lalu kami enda sabar deka betemu enggau kita,” ku iya.
