Bida penatai ngepan enda ibuh dipetalat

“Tiap ngepan enda ngira ari ni bagi menua endang ngembuan pemaik sereta pemanah diri empu.”

BETONG: Komuniti Iban enda patut betalatka bida penatai ngepan nitihka batang ai ba menua tu.

Pengelicha Fakulti Sains Gunaan dan Kreatif (FSGK) Universiti Malaysia Sarawak (Unimas) Prof Madya Dr Noria Tugang madahka tiap ngepan enda ngira ari ni bagi menua endang ngembuan pemaik sereta pemanah diri empu.

“Tiap bagi menua di Sarawak endang ngembuan ngepan asal diri empu lalu nya patut nyadi siti pekara ti ngemegahka bansa kitai.

“Komuniti kitai enda patut betalatka pekara nya tang patut beratika penyelai pemanah ngepan bansa kitai dibandingka enggau orang bukai,” ku iya.

Dr Noria madah munyi nya lebuh bejuraika keretas Pansik Pasal Ngepan Iban Ari Kelia Nyentukka Diatu ba Simposium Ngepan Iban (SNI) 2019 di Kompleks Opis Perintah Nengeri ditu, kemari.

NERANG SILIK… Dr Noria madahka tiap bansa ngepan enda ngira bagi menua ngembuan pemaik sereta pemanah diri empu.

Nangkan nya ku iya, mayuh bida ngepan Iban kelia enggau baka ke dipeda diatu.

“Enti kitai beratika kelia, bala indu Iban nadai bekenaka mayuh perengka ba sereta enda berat dipeda.

“Kebuah pia laban kelia kitai Iban nadai tentu penatai pemisi ti chukup dikena bebelika perengka ngepan ti digaga ari pirak,” ku iya.

Dr Noria mega nerang, chara ngena ngepan kelia mega berindik ari orang lelaki ti rindu meda sida ke indu ngena ngepan muntang sereta enda mayuh perengka ditating ba tubuh sida.

“Tang diatu, pekara nya udah jauh bida lalu perengka baka sugu tinggi, tumpa, buah pauh enggau ke bukai mayuh digaga ngena aluminium.

“Nya ngasuh kitai muntang meli perengka nya taja dijual enggau rega ti mar,” ku iya madah.

Dr Noria mega madahka pengawa ngena ngepan kelia enda tau sengapa baka ke dipeda kitai diatu.

“Lebuh orang bekenaka ngepan tu kelia, nya tanda iya bisi pengawa baka Gawai, miring, melah pinang, nurun ngayau, nyambut antu pala sereta ke bukai,” ku iya nerang silik.

Nya alai ku iya, bansa Iban patut ngemeranka adat enggau main asal ngambika enda lenyau disegang pemansang menua.