Bidayuh pengatur Gawai Dayak Renggat Nengeri 2019

Pengerami Gawai Dayak taun tu deka mandangka penulin, ukai semina makai lemai

KUCHING: Rambai jaku ‘Indi Awang, Indi Asung’ ke meri reti Segulai Sejalai dipilih beserimbai enggau Pengerami Gawai Renggat Nengeri 2019 ke deka diatur komuniti Bidayuh ba nengeri tu.

Rambai jaku tu dipilih asil aum kedua Komiti Pemun Pengerami Hari Gawai Dayak renggat nengeri dituaika Datuk Sri Michael Manyin Jawong ba ditu, sehari tu.

Nitihka penerang Sapit Kepala Menteri Datuk Amar Douglas Uggah Embas nengah sebengkah aum media madah, ungkup taun tu aktiviti pengerami udah ditambah ngambi ngangkatka penulin pengerami Gawai ba nengeri tu bebida enggau taun ke udah semina ngatur pengerami makai lemai renggat nengeri.

“Dikena ngangkatka agi aktiviti dagang temuai, Pengerami Gawai ba renggat pelilih kitai deka ngaga promosyen nyadi pekara dagang temuai seriris enggau Taun Nemuai ke Sarawak 2019,” ku iya madah.

MAYUH AKTIVITI DEKA DIATUR…. Sapit Kepala Menteri Datuk Amar Douglas Uggah Embas mandangka aktiviti ‘Aunthentic Gawai’ beserimbai enggau Pengerami Hari Gawai Renggat Nengeri 2019.-Gambar Alip Noni

Iya mega madah, aktiviti ‘Authentic Gawai’ mega diatur enggau kampung ke deka dipilih iya nya kampung ke ngembuan inap desa.

“Aktiviti ‘Aunthentic Gawai’ tu deka diatur ba Rumah Panjai Annah Rais, Padawan (31 Mei ngagai 1 Jun), Rumah Panjai Pueh, Lundu (31 Mei ngagai 2 Jun 2019), Kampung Duyoh Jangoi, Bau (31 Mei) enggau Balai Suarah Bau (22 Jun), ditangkan di Rumah Panjai Kampung Pichin, Serian (29 Jun 2019) mega diatur pengawa nutup Gawai 2019,” ku iya.

Douglas Uggah nambah, pengawa kepenudi pengerami Gawai Renggat Nengeri tu iya nya Pengerami Makai Lemai Gawai 2019 ke deka diatur kena Hari Enam, 15 Jun tu ila bepalan ba Hotel Imperial Kuching.

“Pengerami tu mega deka digulu Tuai Pemegai Menua (TYT) Sarawak Tun Pehin Sri Haji Mahmud, Kepala Menteri Datuk Patinggi Abang Johari Openg enggau bala pemesai ke bukai.

“Bisi 10 iti mija deka disedia ungkup bala temuai enggau deka diatur Opis Menteri Pengawa Dagang Temuai, Seni,

Adat Pesaka, Nembiak, Lumba enggau Main (MTACYS) enggau Sarawak Tourism Board (STB),” ku iya.

Suara Sarawak