KUCHING: Sarawak merambu deka nyendia penerebai bilun ‘carter’ ngagai temuai enggau temuai menua luar nyeretai program ti diatur nengeri tu pengudah pengawa ngambi serikat penerebai bilun MASwings tembu taun baru.
Premier Sarawak Datuk Patinggi Tan Sri Abang Johari Tun Openg madah, sekeda program tu nyengkaum Pekit Perau Naga Antarabansa enggau program besai bukai ti nyadi sebagi ari pengawa ngelakuka serikat penerebai ti diempu Sarawak nya ngagai dunya luar.
“Aku tadi berandau enggau Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah engka pengerami besai ti diatur ba Sarawak deka diterus.
“Sarawak ngembuan mayuh pengerami ke alai siti ari pengerami tu iya nya Regata Sarawak, nya alai ba taun baru nyema kitai udah tembu enggau pengawa ngambi serikat penerebai tu kitai ulih nyendiaka penerebai ‘carter’ sebagi ari pengawa ngelakuka serikat penerebai ti diempu Sarawak ngagai raban pengemeran lumba nya di luar,” ku iya.
Abang Johari bejaku munyi nya lebuh ditanya pemberita rambau Program Merarau di Dapur Sarawak serimbai Festival Waterfront Kuching ditu pagi tadi.
