KUCHING: Sarawak meseti meri perati ngagai pemansang pemansut biogas enggau biojisim ti mayuh nyadi peluang meransang pengawa meranak puku kuasa beresi ungkup ekonomi hidrogen dudi hari, ku Tuai Pegawai Eksekutif Borneo Biogas, Wen-Bin Qian.
Ku iya, nengeri tu udah bisi pemansut ti diguna dikena ngepun projek kuasa ulih dikena baru ti maju chara komersial lalu meseti ngemerat pengawa mutar chara praktikal ba timpuh pandak dibanding bepanggai ba juluk timpuh panjai.
“Visyen nya betul enggau nyengala tang kitai berati ke pengawa ngemansang nya.
“Beguna endar kitai berati ke peluang ti mudah diraup lalu berati utai dikemisi kitai diatu sereta nama ti ulih dikereja diatu,” ku iya.
Wen-Bin madah munyi nya ba randau panel ngena pejuluk Integrasyen Kuasa Beresi Ungkup Bekal Kuasa Meruan ba Kongres enggau Pemandang Hidrogen Gadung Asia Pasifik (APGH) 2026 ditu, ensanus.
Ku iya, Sarawak bisi pengelebih nyelai asil industri sawit ti besai enggau ngasilka mayuh teda ti ulih ditukar nyadi kuasa ulih dikena baru.
Iya mega madah ke teda ari kilang sawit ulih ngasilka gas metana iya nya gas rumah gadung nengah pengulih pengangkat global urung 28 nyentuk 32 kali lipat tinggi agi dibanding karbon dioksida.
Iya madah baru, taja hidrogen mengkang nyadi komponen beguna ba pengawa munas bekau karbon dudi hari, hidrogen aja enda ulih nyukung industri ili.
Tang, ku iya, pengaya biojisim enggau karbon biogenik di Sarawak meri pengelebih semekih besai ba pemansang bahan api meruan enggau produk kimia baruh karbon.
“Sarawak ngembuan mayuh ai enggau biojisim. Enti bejaku pasal industri ili, kitai begunaka karbon.
“Sarawak bisi mayuh karbon biogenik enggau rentayan ti genap,” ku iya.
Wen-Bin mega nyemetak madah ke minyak bilun meruan (SAF) nyadi chunto baka ni pemansut biojisim Sarawak ulih ditukar ngagai produk berega.
Ku iya, nengeri tu ngasil urung empat juta tan tandan sawit puang ninting taun, ti bisi pengulih mansutka urung 200,000 tan SAF setaun nengah teknologi ti bisi diatu.
Terang iya, biogas enggau biojisim enda patut dipeda ulih ngalah ke hidrogen tang patut nyadi pemansut ngenap ekosistem kuasa beresi ti besai agi.
“Biogas, biojisim enggau hidrogen; semua nya sebagi ari integrasyen kuasa beresi.
“Bahan besai iya nya karbon lalu enti nadai karbon, kitai enda ulih ngaga mayuh produk kimia ili,” ku iya.
Nya kebuah, Wen-Bin madah ke Sarawak mengkang nyadi entara sekeda kandang menua ba dunya ti ngembuan gempung pemansut ulih dikena baru, bahan mata biojisim enggau pengulih industri ti diguna dikena ngemansang ekonomi kuasa baruh karbon begulai.
