Bisi pengulih besai nyungkak ekonomi

Industri Betanam Betupi

KUCHING: Sarawak nyadi sebuah menua bisi pengulih besai ba industri betanam betupi.

Penanggung Pengawa Presiden enggau Ketuai Pemesai Eksekutif Agrobank Khadijah Iskandar madah pengulih tu ulih dipeda ba pemanah rikod belanja Agrobank di Sarawak.

“Naka Jun 2019, belanja udah dikeluarka Agrobank penyampau RM 1,202.38 juta.

“Lalu niki 9.4 peratus, lebih tinggi ari dirikod ba timpuh sama taun 2018,” ku iya.

KENANG… Khadijah (lima kiba) enggau Ketuai Pemesai Perniagaan Ahmad Shahril Mohd Shariff begulai enggau semilan penerima surat disediaka belanja Agrobank ti bisi datai nyerumbaprogram Agenda Agro: Prospek enggau Peluang ba Sektor Betanam Betupi kemari. – Gambar NADIM BOKHARI.

Khadijah mansutka jaku nya lebuh bejaku ba Agenda Agro: Prospek enggau Peluang Ba Sektor Betanam Betupi ba sebuah hotel tebilang ditu, kemari.

Ku iya, Agenda Agro tu siti pelasar disediaka piak bank berengkah ari taun 2015 ungkup orang ti begunaka tulung tauka client bank sida.

“Nengah program tu, kitai berandauka peluang enggau prospek sereta pengerembai pengawa betanam betupi.

“Program tu meri rega tambah ngagai client nemu penerang baru nyengkaum bekaul enggau polisi perintah ti mantu komuniti betanam betupi nambahka penatai pemisi sereta nyungkak ekonomi sida,” ku iya.

Berebak enggau nya, bisi sepuluh deka nerima surat disediaka belanja Agrobank enggau belanja sepenyampau RM 8,135,000.

Kelimpah ari nya, Agrobank mega nyerahka setipikit ngagai empat AGROAgent baru sereta tiga AGROAgent pemadu nyulut di nengeri Sarawak.

“Servis ejen bank tu sebagi ari inisiatif piak Agrobank ngerembaika servis bank.

“Naka June 2019, sepenyampau 1,069 AGROAgent udah direjista selampur Malaysia lalu di Sarawak aja kitai bisi 114 AGROAgent,” ku iya nerang.

Berebak enggau program nya, 160 client Agrobank enggau bala pedagang betanam betupi selampur Sarawak bisi datai.

Sama bisi datai Ketuai Pemesai Dagang Ahmad Shahril Mohd Shariff sereta ejensi perintah enggau peribit.