Bomba begunaka 100 agi orang nyaup ngerara api

MIRI: Piak bomba begunaka abis nadai 100 iku agi orang nyaup pengawa ngerara api ke makai kampung, babas enggau tanah kerapa ditu.

Ketuai Bomba enggau Penyah Penusah Miri Law Poh Kiong madah, naka pukul 12 tengahari kemari, urung 784 hektar nyengkaum kandang kampung, babas enggau tanah kerapa ba Kuala Baram diripotka udah angus kenyau 1 Ogos tu tadi.

Nitihku penerang iya, operasyen ngerara api ke nganguska kampung terus dipejalaika 32 iku bomba ari Balai Bomba enggau Penyah Penusah (BPP) Miri nyengkaum staf Naim.

“Sebun asap ke balat ba kandang operasyen ngenusah pengawa ngerara api.

“Chara ‘water bombing’ bedau ulih dipejalai laban nya tau bendar ngeruga pengelikun raban ti deriba bilun engkabang ketegal asap ti kelalu balat,” ku iya madah ngagai raban pemberita maya dirandau ramnbau penemu Adun Piasau Datuk Sebastian Ting di Menara Tinjau Tudan ditu, kemari.

Kenu ku iya mega, pengawa ngerara api nya semina ulih dikereja terus nuju asap ke benung balat.

“Nya alai, kami begunaka saup abis nadai 100 iku agi ba pengawa ngerara api tu.

“Kami udah dipadah piak ari Kuching deka nganjung raban mantu lalu dipelaba datai enda lama agi nyaup pengawa kami ditu,’ ku iya.

Berebak enggau nya, tikas Indeks Pengamah Angin (IPU) naka pukul 6 kemari agi mandangka ILP Miri ba kategori tau ngeruga pengerai (agin kelalu kamah) iya nya 396.

Bacha IPU entara 0 ngagai 50 dikategori agi manah, 51 ngagai 100 (jelan pengamah), 101 ngagai 200 (enda manah), 201 ngagai 300 (chukup enda manah) lalu 300 ke atas (kelalu kamah).

ENDA MANAH KE PENGERAI…Ketuai Bomba enggau Penyah Penusah Miri Law Poh Kiong mandangka IPU di Miri ba tikas kelalu kamah.