KUCHING: Burung Camar Cina Berjambul tauka Ensulit Tasik, nya spessies burung tasik ti nyau deka punas nya bisi dipeda baru ba luar kandang tasik Asajaya dalam bulan Februari taun tu tadi.
Burung enggau nama saintifik Thalasseus bernsteini nya kepenudi dipeda di Sarawak taun 1913, lebih 100 taun ke udah, ti ngasuh mayuh orang tekenyit sereta alit ati.
Ku Serakup Talukka Rampa Menua Malaysia Pampang Kuching nengah siti penerang madah, pekara ti jarang nyadi nya ditemu Dr Ng Jia Jie, siku lutur jelu enggau kaban regas komuniti rampa menua asal begulai enggau tim iya.
Nya ngasuh raban ti angkunka pengawa ngintu enggau nyaga rampa menua sereta rindu ke burung berasai andal sereta gagit.
“Tu pekara dianti ti nyadi nyata ngagai tim kami laban ulih tetemu tauka meda baru spesies ti jarang endar ditemu di Sarawak pengudah lebih 100 taun.
“Aku ngelala Burung Ensulit Tasik tu ari chura chelum ba ujung patuk iya,” ku Ng nengah penerang nya.
Iya madah baru, Burung Ensulit Tasik nya ditemu ba seraban mit kira 10 ngagai 20 20 Great Crested Terns (Thalasseus bergii), spesies ti suah dikait enggau endur diau beserak penteba fizikal sebaka.
“Sekali ngilas, kededua dipeda nyau deka sebaka tang Burung Ensulit Tasik tu mit mimit, pemesai tubuh kira 38 ngagai 43 sentimeter, dibanding Great Crested Tern 43 ngagai 53 sentimeter.
“Kededua burung tu mega bisi ‘ketapu chelum’ mimit ba punjung (ari belakang) lalu maya enda betelu, kededua spesies bisi kening burak,” terang iya.
Ng madah, ba tikas global, dipelaba semina urung 50 Burung Ensulit Tasik ti besai aja bisi diatu.
“Nya alai burung tunggal ti ditemu di Asajaya tu semina ngari ke dua peratus aja ari penyampau populasyen burung tu kebendar,” ku iya nyemetak.
Burung Ensulit Tasik bisi bansa enggau nadai mayuh purih di sepanjai pantai timur China enggau sebelah pulau ti bekaul, baka ba menua Taiwan enggau Korea Selatan.
Maya musin chelap, sida mindah ke Selatan, ngiga endur ti angat agi baka di pantai Asia Tenggara nyengkaum Kepulauan Maluku, kepulauan di Indonesia enggau Davao del Norte di Filipina.
Pantai Asajaya nya sebagi ari Sitak Beguna Burung enggau Biodiversiti (IBA) Teluk Bako-Buntal enggau Sitak Biodiversiti Utama (KBA) ti nyadi sebagi ari 55 IBA di Malaysia.
Ngembuan pemesai urung 35.9 kilometer persegi, IBA Teluk Bako-Buntal ngunjur ari ari Santubong ke nanga Sungai Sadong penyauh 28 kilometer seraya Taman Negara Santubong enggau Bako, dua sitak dijaga penuh nyerangkung 17.6 peratus ari endur nya.
Nya alai, Chairman Serakup Talukka Rampa Menua Malaysia Pampang Kuching, Rose Au madah, pengawa nyaga spesies burung nya endang patut chakah dipejalai.
“Burung Ensulit Tasik tu nyau deka punas, bepun ari mayuh penanggul nyengkaum puntan betelu ketegal diasu enggau dagang telu kelimpah dikerugu penusah menua kudi enggau biau balai.
“Pia mega pengawa nginti kerang semak enggau sarang burung tu betelu udah ngachau proses mansutka purih,” ku iya.
Rose nyemetak madah ke pemesai guna ekologi Teluk Bako-Buntal, ti nyadi endur musin chelap ngagai burung ti datai ari Asia Timur Laut di sepanjai jalai migrasyen Asia Timur-Australasia.
“Teluk Bako-Buntal tetangkupka penteba IBA laban maya musin chelap di hemisfera utara, endur nya nyadi tuai rumah lebih satu peratus ari populasyen dunya sekeda spesies ti nyau deka punas baka Chinese Egret (Egretta eulophotes) enggau Far Eastern Curlew (Nomeniusmadagascariensis),” terang iya.
Rose madah, tim sida udah bejalaika pengawa matau populasyen Far Eastern Curlew di baruh projek ti dipelanja Konvensyen Ngelala Pengawa Ngintu Spesies Migrasyen Jelu Siga enggau disukung Ejensi Kampung Sarawak (SFC) lebuh sida enda ngadang diri chukup betuah ulih tetemuka Burung Ensulit Tasik nya. – NICK FLETCHER
