KUCHING: Stesyen radio Cats FM deka meri pemakai pagi pechuma ngagai 500 iku ti datai ngagai Restoran Chanai Anjang Astana ba Petra Jaya kena pagi Hari Tiga (7 Februari 2023).
Menijar Program Cats FM, Mohd Fadzli Daud madah, pemakai pagi nya sebagi ari aktiviti ba baruh Program CAC Spon ti dibantai sida ba Cats AM Crew (CAC).
“Ba renggat keterubah Program CAC Spon, Cats FM deka melanja pemakai pagi tebilang ba Malaysia iya nya ‘kombo roti chanai enggau teh tarik’ ngagai 500 iku.
“Ari penyampau nya, bisi 300 pemakai pagi deka diberi ngena chara drive-thru lalu 200 ti bukai deka diberi ngagai sida ti makai ba restoran,” ku iya ba sebengkah penerang media.
Iya madah, pengawa meri ngena chara drive thru deka berengkah diatur pukul 7 pagi nyentuk pukul 8 malam lalu makai ba restoran deka berengkah ari pukul 8 pagi nyentuk pukul 10 pagi.
“Tiga iku dejay CAC iya nya Ardin Balarek, Fir Affandi enggau Elya Nabila deka datai ngerami sereta bejaku ba program nya ila.
“Program CAC Spon deka diatur ninting bulan iya nya dejay radio deka melanja mensia mayuh lalu aktiviti tu enda semina betatak ba pekara pemakai aja,” ku iya.
