CC Beauty: Indu Iban terubah ‘Homemade – Handmade’ sabun

BINTULU: Belalauka leka jaku ‘homemade’ – gaga di rumah enggau ‘handmade’ – gaga jari, ngemai Cecelia Lagak,31 taun, ngeringka ati nyingkang jauh agi ba pengawa ngaga sabun enggau kereban penganta bukai.

Indu Iban asal Kapit nya madahka diri nguji ngereja pengawa ti balat dikenangi komuniti dunya bekenaka ‘mercury’ laban endang ditemu bisi sekeda deka betanyaka utai ti mar dikearap baka ngaga sabun tu.

Taja pia, Cecelia enda mantul ati tang majakka pengawa diri ngemansangka produk sabun enggau penganta bukai ti digaga ari jari diri di rumah lalu ngelaku nengah dagang digital baka Market Place ba Facebook kelimpah page diri empu.

“Terubah ngaul diri ba pengawa tu dalam taun 2015 suba berengkah ari belajar enggau ngiri penemu ba mayuh bengkah ejensi ari perintah enggau peribit nyengkaum belajar di Sabah enggau sebuah kiliang nginjin sabun di Kota Kinabalu.

“Pengudah beberapa minggu belajar chara pemun din, aku nampung pelajar ngagai Tawau urung sebulan pengelama ba kilang ti sama.

INDU IBAN… Cecelia (kanan) begulai enggau bakih iya sama mujur nerima tanda basa beserimbai Malam Semarak Kasih Dewanita DUBS apin lama ke udah.

“Pulai ari Tawau, aku ngemanjaika singkang ngiri penemu ngagai menua Seri Kembangan, Selangor, belajar silik agi chara ngaga sabun lalu semua tu ngena belanja diri empu,” ku iya nerang.

Cecelia mega kala belajar ba Institut Dagang Menua enggau nyadi penyereta Insken ti patut diberi latih pengelama empat bulan ari bala pakar industri menua.

Kesemua penerang pasal kus enggau latih ti bisi disedia tu digiga iya nengah website sida ti semampai ngemaruka penerang enggau rintai sereta hari bulan ngatur kus, program enggau latih.

Iya mansutka jaku tu lebuh dirandau Suara Sarawak pengudah nerima Anugerah Usahawan Belia Harapan beserimbai enggau Pengerami Makai Lemai Semarak Kasih diatur raban indu Balai Dagang Bumiputera Sarawak (Dubs) ditu apin lama ke udah.

Pengerami nya udah ngangkatka Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Sri Hajah Fatimah Abdullah nyadi temuai dipebasa enggau bejadika pengerami sereta nyuaka tanda basa ngagai bala penerima.

TEMEGAH… Cecelia (tiga kiba, bediri rintai mua) begambar ungkup kenang begulai enggau bala bukai pengudah nerima tanda basa.

Nikal baru ngagai batang randau, taja nadai ngembuan pelajar tinggi baka orang bukai, tang Cecelia ransing ati ngambi pelajar Jaku English ba Kolej Sedamai di Bintulu sereta chakah ngaul diri ba Dubs ti mayuh nyendiaka peluang enggau pelasar ngagai bala pedagang ngepunka pengawa sida.

“Ngembuan seling penemu Jaku English, aku muntang agi bejalaika dagang enggau ngiga utai sereta penemu baru sebelah portal berita tauka penerang pasal produk ti bisi dijual ba makit sabun enggau produk penganta.

“Kelimpah ari ngiri penemu baru, aku mega ulih nemu gaya peminta enggau produk dikedeka bala penguna nitihka gaya pengidup kemaya hari ti rinduka produk ngasuh burak enggau kulit mua lis nyengkaum produk ngasuh kurus,” ku iya.

Dikena nambahka penemu enggau peneleba ba dunya dagang, iya mega enda leju ngulu macham kus ti diatur raban Kaunsil Pemansang Ekonomi Sarawak (SEDC), Majlis Amanah Rakyat (Mara), Tekun Nasional, SMeCorp enggau ke bukai.

Ku iya, ari penemu dipejalar lalu diansah nyadi penau enggau pengelandik dikena ngemansangka diri sereta ngajar orang bukai pasal chara ngaga produk penganta ari utai asal.

TANDA BASA… Cecelia (kiba) begulai enggau Chairman Dubs Bintulu, Hj Abdul Kadier Sahib (tengah) disempulang bini iya, Hajah Sultan Fatimah sereta penerima Anugerah Usahawan Wanita Harapan Kategori IKS Razuna Kiprawi.

Mungkal singkang lalu nyadi indu Iban ngaga sabun ukai pengawa ti muntang dikereja, tambah mega pengawa baka tu jarang dikereja orang, ku Cecelia.

“Ba runding orang bukai engka ngaga sabun tu nadai penguntug tang semina masau jam laban enda ulih digaga mayuh – digaga jari diri enggau di rumah. Asil tentu mega mimit.

“Tang aku nadai ngerunding utai baka nya lebuh terubah belajar suba, engka dibai ati rindu enggau keran deka belajar dikena ngubah idup diri empu laban ngira diri nadai pemandai ba sekula.

“Nya alai, lebuh produk sabun tu ngangkatka aku pegari nama, tampak rita entara pedagang produk sabun tebilang di menua tu, bisi mega ati berasai sinu lebuh ngenang pejalai diri ngelama tu,” ku iya ngenang nasip diri.

Pia mega ku iya, nengah kus enggau latih ti kala diatur, tebal agi bala penyereta nyau ulih ngatika diri ngaga produk baka sabun ungkup diri empu enggau dijual.

CC BEAUTY … Entara produk ngena chap dagang CC Beauty baka sabun, serum, pupur, losyen, enselup enggau ke bukai.

“Temegah ati mega laban ulih nulung sereta ngembing sida ngaul diri ba pengawa tu lalu ditunda bala bukai kelimpah besaup ngemansangka industri dagang sabun enggau produk pemajik tu.

“Tu mega nandaka runding bansa kitai udah nerima enggau nitihka ubah singkang pemansang dagang jeman kemaya hari sereta nadai ati sanggu ngaul diri enggau nguji dagang baru,” ku iya berasai lantang.

Cecelia mega mujur nempa nama ngena chap dagang diri empu dikumbai CC Beauty ti udah rembus ke makit selampur menua nyengkaum di Semenanjung enggau Sabah sereta menua Brunei Darussalam enggau Indonesia.

Entara produk ngena chap dagang CC Beauty iya nya serum sarang burung, pupur mua, losyen tubuh, produk nyaga kulit, enselup enggau sabun mua sereta mayuh ke bukai.

Besai juluk ati Cecelia deka ngerembaika dagang enggau produk tu dataika renggat entarabansa, setipak enggau chap dagang tebilang produk penganta enggau manahka pengerai ke bukai.

Ku iya, produk dijual baka sabun diguna ba pengidup besehari sehari, nyaga pemeresi tubuh ungkup pengerai mensia lalu diatu ari bau rengut sabun ti digaga ari utai asal majak nerima peminta nyadika tepa maya bisi pengerami kelebih agi melah pinang.

Pengawa baka tu ku Cecelia, kelimpah dipeda nyadi rega tambah ulih mega ulih meri belanja tambah kelebih agi raban indu ti gawa ngintu ruang bilik tang ransing ngaul diri ba dagang.

“Aku diatu mujur numbuhka palan keterubah kandang sebulan ke udah diberi nama Cc Beauty Centre (Natural Skincare & Beauty Store) ba tengah pasar Bintulu ditu.

“Palan tu enda jauh ari Medan Carpet, seberai Sajian Mas. Ditu aku muntang agi bejalaika pengawa ngaga produk penganta lalu sida ke bisi ati belajar tau datai kitu ngelawa aku empu.

“Aku mega bisi ngatur latih ngena rega ti patut lalu barang sapa ti begunaka bilik latih enggau bilik aum tau mega datai kitu, besukungka dagang pangan diri,” ku Cecelia.

Tanya enggau penerang silik tau telefon nuju Cecelia ba lumur 0168441928 tauka https://www.facebook.com/ceciliaonilia.lagak.