Chalun PSB ba Engkilili enggau Batang Ai dibantai

LUBOK ANTU: Parti Sarawak Bersatu (PSB) mantaika nama Kaban Kunsil Nengeri (Adun) Engkilili Dr Johnical Rayong Ngipa dipilih nyadi chalun parti tu ngetanka penuduk sitak Engkilili ba Pengawa Bepilih Nengeri (PRN) ke-12.

Presiden PSB, Dato Sri Wong Soon Koh rambau mansutka pekara tu mega madahka sitak Dun Batang Ai deka diarika ex-Kaban Parlimen Lubok Antu Datuk William Nyalau Badak.

“PSB deka bediri ba penuduk ke ulih menang…nyangka 50, 60 tauka semua 82 penuduk bepelasarka pengandal enggau sukung rayat ngagai kitai, tambah mega sukung diperati majak nambah ninting hari,” ku iya.

“Kitai andal enggau gaya ubah pengundi Dayak lebih agi ba menua pesisir sereta pengundi Bumiputera bukai deka ngujungka PSB ulih nyadi parti ke dipilih rayat udah tu.

“Laban nyadi parti pupu bansa sereta nadai sebilik enggau sebarang parti ngujungka PSB peneka mantaika isu ke pemaik rayat enggau nengeri tu,” ku iya.

Soon Koh ke mega ex-Menteri Wang Kedua enggau E-Dagang bejaku munyi nya ba mua lebih 1,000 iku penyukung parti rambau bejadika Opis Servis Batang Ai di pasar Lubok Antu ditu, pagi tadi.

Dr Rayong ke mega Sapit Presiden PSB deka ngetanka penuduk nya ke dipegai iya pengelama tiga penggal lalu Nyalau keterubah iya bediri ba sitak nya pengudah dua penggal nyadi kaban parlimen.

Sebedau tu, PSB udah mantaika sekeda nama chalun ke deka bediri ungkup PRN12 iya nya Kaban Parlimen Sri Aman Datuk Masir Kujat ba Dun Balai Ringin, Datuk Ranum Mina (Opar) enggau Datuk Dr Tiki Lafe (Tasik Biru).

Sama bisi datai Mandal Presiden Datuk Ranum Mina, Kaban Parlimen Sri Aman Datuk Masir Kujat, Datuk Dr Tiki Lafe, Datuk Slyvester Entri Muran, Dato Kristopper Nyuak, Profesor Dr Saudi, Banyi Beriak enggau bala bukai.