KUCHING: Empas pengerekai rampit Covid-19 udah ngujungka mayuh pekara berubah nyengkaum chara belajar, struktur pelajar nyengkaum ba bidang pelajar tumu nembiak (ECCE).
Bekau ari nya, pejalai Program Aum Pelajar Prasekula Entarabansa Taun 2021 ti berengkah 1 nyentuk 3 Oktober tu entara siti chara dalam mantu raban pengajar tumu anak mit napi ubah gaya baru.
Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah madahka, sebedau pandemik Covid-19 ngerekai, pelajar ECCE digaga betimpai mua ke alai raban pengajar ulih berandau terus enggau nembiak.
Tang ku iya, udah pandemik ngerekai, mayuh kelas ECCE udah ngalih ngagai online enggau nyadi pemar besai ngagai pengajar dalam ngatur belajar chara baru.
“Nya alai, lebuh Covid-19 ngerembai ari pandemik nyadi endemik, kitai mesti nemu ngatur diri diau ba gaya baru lebuh ngajar enggau belajar.
“Nya kebuah, nengah aum tu, semua pesereta (pengajar) ulih besilih penemu enggau belajar sentang chara pemadu engkeman napi ECCE,” ku iya.
Fatimah mansutka pekara nya ba Program Aum Pelajar Prasekula Entarabansa Taun 2021 ti dipenyadika Kepala Menteri Datuk Patinggi Abang Johari Tun Openg ke dipanchar terus ari Facebook Kaunsil Pemansang Tumu Anak Mit Sarawak (MPAKS), ensana.
Ku iya, aum nya nyemetak nunjukka komitmen opis menteri iya dalam nentuka pengawa ngintu, nyeridi enggau pelajar tumu anak mit terus diperatika.
Kelimpah ari nya, iya madahka rambai jaku Aum Pelajar Prasekula Entarabansa Taun 2021 ke sekali tu disebut ‘Pembinaan Watak Insan dalam Norma Baharu’.
“Tu seriris enggau siti ari pelasar aum ti deka nentuka genap iku anak disikap enggau ulah ti manah nyentukka iya ulih nerima gaya baru kelebih agi lebuh napi pemar tu.
“Nya mega dikena nambahka penemu enggau pemereti raban pengajar sentang pemun nyeridi nembiak kelimpah ngelala pemar nyeridi ulah, pengelandik, minat enggau peluang anak mit maya pandemik Covid-19.
“Aum tu mega diatur dikena nambahka peneleba pengajar dalam gaya baru nanam pengerembai rohani, kognitif, rama, fizikal enggau runding nembiak,” ku iya.
Ku iya, pesereta aum nya ukai semina disereta pengajar enggau penyaga ECCE menua tu empu, tang pesereta ari menua luar baka menua Jipun, Singapore, Brunei, Indonesia enggau ari Semenanjung Malaysia.
“Taun tu, taja pan kami nyelinting 950 iku pesereta, tang timbal ari sida ngelui ari nya laban bisi 1,000 iku pesereta ti bisi datai.
“Kami berasai temegah enggau pengajar ECCE laban seruran bisi ati deka ngemansangka diri nyadi pengajar enggau penyaga ti manah,” ku iya.
Iya mega madahka bisi lima iku pengelicha entarabansa dipilih mantaika keretas kereja sida iya nya Nurul Nadiah Sahimi (Malaysia); Dr. Christine Chen (Singapore), Prof Emeritus Yoichi Sakakihara (Jipun), Prof Dr Supriyono (Indonesia) enggau Dayang Siti Zaharah Abdul Razak (Brunei).
