BAU: Lambang menua baru Bau, Christ Is King Statue ba pintu penama Bukit Singai nyadi sebagi ari inisiatif Greater Bau ngangkatka sitak nya nyadi hab dagang temuai ba Sarawak.
Kaban Kunsil Nengeri (ADUN) Tasik Biru, Datuk Henry Harry Jinep madah, lambang pengarap ikonik raban orang Kristian dia ukai semina nyadi lambang ngelaika pelilih nya taba pengarap besai aja tang mega dikena matak penatai temuai kia.
Sapit Menteri Pengangkut nya madah, Palan Ngusung Memorial Katolik (CMPC) ba tuchung Bukit Singai tebilang ngerembaika pengarap Katolik ba Bau dalam taun 1,888, nya kebuah CMPC dikelala bala pengusung.
“Bisi mega sekeda bala pengusung ke sudah datai ke Bukit Singai megai pengarap bukai.
“Nya alai taun tu, kitai nirika Christ Is King Statue dikena ngelaluka penatai raban orang Kristian nyengkaum pengusung ari menua tu enggau menua luar datai ke Bau,” ku iya lebuh ba rumah iya ditu, tadi.
Henry mega madah, pengerami merekat ba pinta penama nya deka diatur kena 1 Januari 2024, urung pukul 10 pagi.
Kelimpah ari nya ku iya, bisi mega diatur pengawa merekat Christ Is King Statue ba hari ke sama ti deka dipenyadika Uskup Agung Simon Poh.
“Dipelaba 2,000 deka datai ngulu pengawa merekat tu ila,” ku Henry.
Iya mega madahka Christ Is King Statue udah didiri kena 21 Disember tu tadi lalu diatu udah datai ba ujung pengawa berati dipejalaika raban menggi tanggungpengawa.
Ungkup penerang, statue ke bediri gah ba pintu penama Bukit Singai nya deka dibai dalam rintai lambang pengarap ke bukai, nyengkaum gerija enggau perengkaguna ke bisi ba tengan jalai nuju Bukit Singai ditu.
