BELAGA: Kepala Menteri Datuk Patinggi Tan Sri Abang Johari Tun Openg ngenukuka penyandang Dun Murum Kennedy Chukpai Ugon agi disabung ngarika Gempung Parti Sarawak (GPS) baru ba sitak tu dalam Pengawa Bepilih Besai Nengeri (PRN-12) ti deka datai.
Kelimpah ari nya, iya mega bisi meri kelai penyandang Dun Belaga Datuk Liwan Lagang engka deka bediri baru ngarika GPS dalam PRN-12 tu ila.
“Aku ngenukuka Kennedy Chukpai nyadi manuk sabung GPS.
“Enti kita nyukung iya (Chukpai), reti nya kita mega nyukung aku,” ku iya.
Abang Johari bejaku munyi nya rambau Program Tuai Begulai enggau Rayat di Sungai Asap Belaga ditu, kemari.
Ku iya, agi mayuh perambu pemansang deka digaga ba kadang menua nya ungkup rayat.
“Tadi Kennedy Chukpai minta 10 perambu pemansang ari rayat ngagai aku.
“Tang sayau, kita minta lebuh aku udah nadai mandat tauka kuasa agi laban kuasa nya udah pulai ngagai rayat.
“Nyema kita deka semua peminta tu dipejalai enggau lengkas beri mandat baru ngagai GPS,” ku iya.
Ba PRN-11 (2016) Kennedy Chukpai menang atas tikit Barisan Nasional enggau majoriti 2,200 undi ngalahka Methew Silek (DAP), Abun Sui Anyit (PKR) enggau Stanley Ajang Batok (Independent).
Kelimpah ari nya, Liwan mega menang atas tiket BN dalam PRN-11 (2016) enggau majoriti 3,686 undi ngalahka Alexander Lehan (PKR).
