ROBAN: Siku penenun lokal, Connie Daud, 58, ari Rumah Mawat, Bratong Atas ditu chakah nyaga enggau ngetan seni tenun pua kumbu dikena nentuka pesaka budaya komuniti Iban ti ngembuan rega estetika enggau sejarah nya terus ditampung.
Iya ngarap pengawa ngasil pua kumbu chara asal nya patut terus dijaga dikena nentuka seni tenun nya seruran ditampung rebak dudi.
Ngembuan peneleba lebih 15 taun ba pengawa nya, Connie chukup ngemerat pengawa ngena perengka asal dikena ngasil chura ubung ti bekualiti tinggi. Entara perengka ti dikena nyengkaum urat kayu engkudu, kayu engekerebai enggau utai tumbuh ti bukai.
Iya madah, semua perengkah nya beguna amat dikena ngasilka chura ubung ti bekualiti ungkup bejalaika pengawa nenun pua kumbu. “Genap lambar pua kumbu ngembuan motif ti bebida sereta ngembuan reti kediri empu,” ku iya.
Tampung Connie, tebal agi motif nya ngempung elemen asal enggau kontemporari sereta enda ngeruga penulin seni tenun nya.
Iya madah, pua kumbu ukai semina diaku nyadi pesaka budaya tang ulih digaga ke gari, kantung sereta aksesori moden ti ngempung penyelai asal enggau pisin kemaya hari.
“Seni tenun tu bisi pengulih nyadi pemansut ekonomi ti ulih nyungkak penatai pemisi ngagai komuniti lokal,” ku iya.
Dikena nentuka pesaka nya meruan ditampung, Connie bisi muka kelas nenun ungkup sebarang orang ti bisi ati deka betenun kelimpah ngelakuka produk iya di kedai krafjari, tali arus enggau nengah pemandang festival main asal. – RJ
