KUCHING: Sarawak sehari tu ngerikodka siti kes bebadi nyawa baru ketegal igi penyakit Covid-19.
Penyampau nya ngujungka bisi semilan kes bebadi nyawa ketegal Covid-19 ba nengeri tu pengudah kes keterubah nyadi kenaka 17 March tu tadi.
Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka bisi 23 kes baru positif Covid-19 lalu ngujungka bisi 211 kes positif kenyau kes keterubah diripotka kenaka 13 March.
“Ari penyampau kes nya, bisi 21 kes benung diperubat di Sepital Besai Sarawak (HUS) lalu dua kes di Sepital Sibu.
“Kelimpah ari nya, bisi 91 kes baru orang dipelaba (PUI) kena rampit Covid-19 lalu ngujungka bisi 1,379 kes PUI ba nengeri tu,” ku iya.
Uggah madah munyi nya ba aum pemberita pasal Covid-19 di Wisma Bapa Malaysia ditu, lemai tadi.
Nangkan nya ku iya, bisi 1,082 kes udah ditemu negatif lalu 86 kes PUI agi nganti pemutus ari makmal.
“Ngagai kes PUI ke baru nya, bisi 63 kes ditemu di Kuching ke alai 33 kes nya udah diperesa di Kompleks Nembiak, Lumba enggau Main (KBS) lalu 33 kes agi ditemu di HUS,” ku iya.
Berebak enggau nya, Uggah madahka bisi 95.3 peratus rayat ba nengeri tu udah nitihka Atur Tagang Pejalai (PKP) lalu piak polis munur ngetanka 37 iku rayat nengeri tu ke ngelaban atur nya.
Naka 1 April tu tadi, bisi 41 iku udah ditemu besalah di kort ngelaban PKP, ku iya.
