SARATOK: Sekula Primari (SK) Nanga Gerenjang diasuh tutup sementara berengkah ari 1 March tu tadi.
Nitihka penerang, pemutus nya berindik ari siti kes positif Covid-19 dirikod ke datai ari sekula nya ngujungka sekula ditangguh ari 27 Februari nyentuk 12 March ila.
Nya alai, 24 iku pengajar enggau staf sekula nyengkaum jaga enggau pengereja bukai dia diasuh kuarantin kediri pengelama 14 hari berengkah 1 March mega dikena nagang Covid-19 ngerekai.
Sida ti kuarantin kediri ba rumah tu dipatau rat raban Opis Menteri Pengerai Malaysia (KKM) kelimpah Atur Standard Pengawa (SOP) diterit baka selama.
Berebak enggau nya, Sapit Menteri Pengeluar Kuasa enggau Pengeraja Asal, Datuk Ali Biju berumban ngerah raban ba Palan Servis Komuniti Sitak Parlimen Saratok nganjung bantu ngagai sida nya.
Iya madahka diri deka seruran mantu barang sapa ke napi penusah sekumbang atur pengawa nagang enggau ngemunaska Covid-19 dipejalai ba menua nya.
“Aram mih kitai sama ngesan tanggung pengawa ngambi pandemik tu jampat pukas lalu menua Saratok deka pulai likun baka suba.
“Aku pechaya, kerejasama ari semua deka ngasuh menua kitai jampat suman ari igi penyakit tu, rayat badu nangi sereta ulih diau enggau ati lantang,” ku iya lebuh dirandau Suara Sarawak.
Berita penuh Ruai 4 pagila
