CPPC engkeman digaga semak padang bilun

LIMBANG: Perintah Sarawak ngarapka Palan Ngumpul, Proses enggau Mungkus (CPPC) buah rian enggau asil tanam betupi ke bukai ulih digaga semak enggau endur penyangkai kapal sereta padang bilun.

Sapit Kepala Menteri Datuk Amar Douglas Uggah Embas madahka endur strategik baka nya dipilih laban ke nyadi jalai tama enggau pansut ngagai nengeri tu.

“Diatu kami benung nirika palan ke sama di Betong, Lawas enggau Long Lama.

“Kami benung beratika pengelebih ba menua pesisir kelebih agi endur ke mayuh buah rian enggau pun buah ke bukai,” ku iya pengudah pengawa ngabas pejalai projek ngagai CPPC Limbang ditu, pagi tadi.

CPPC Limbang ke beungkus RM5 juta nya disadang deka ngepunka operasyen sida ba bulan Februari taun baru.

Nangkan nya ku iya, sida benung beratika pengelebih ba menua pesisir kelebih agi endur ke mayuh buah rian enggau pun buah ke bukai.

“Kami deka mantu sida ke betanam betupi tu ngiga endur nyual produk sida ngambika sida ulih nambah penatai pemisi nengah kompeni ke dipilih,” ku iya.

Taja pia iya nyemetak madahka semua palan nya patut ngembuan setipikit pengelikun pemakai ke diaku tikas entarabansa ngambika ulih masuk ngagai makit menua luar baka China, Singapore, Hong Kong enggau Taiwan.

Suara Sarawak