Dadah berega RM210,600 mujur dirampas Kastam Miri

MIRI: Opis Kastam DiRaja Malaysia (JKDM) Miri ngerampas 9,980 leka pil bansa Eramin 5 dipelaba berega RM210,600 lebuh bejalaika operasyen ba sebuah kedai di Jalai Acacia kena Hari Empat tu tadi.

Penusah tu nyadi urung pukul 9.30 pagi ke alai seraban penerit adat JKDM Miri bejalaika operasyen ba sebuah kedai nuchi kerita pengudah nerima penerang pasal bungkus dipelaba ngundan dadah.

Bungkus dadah nya dianjung pengereja serikat servis kurier ngagai penerima ba sebengkah endur di Miri.

Direktor Kastam Negeri Sarawak Datuk Sharifah Halimah Tuanku Taha madah, ba operasyen nya sida ngetan siku lelaki beumur urung 35 taun enggau siti tungkus dipelaba ngundan dadah baru diterima pengudah diberi pengereja servis kurier nya.

“Operaysen ba sebuah rumah semak kedai nya ngujungka nangkap siku agi lelaki iya nya pengempu kedai dipelaba ngereja aktiviti meri enggau nyual dadah.

“Lebuh meresa bungkus nya, kami mujur tetemuka 9915 leka pil Eramin 5 enggau repu kristal dipelaba dadah bansa ketamine urung 1015 gram,” ku iya meri penerang, kemari.

Nambahka nya, kami mega tetemuka 65 leka pil Eramin 5 enggau urung 10 gram repu dipelaba ketamine lebuh tama ngagai opis kedai nya.

“Kami ngasaika sida meli dadah chara online enggau ngena serikat kurier ngambi nganjung dadah ngagai kedai nya.

“Kedai nya endur nyimpan dadah sebedau dianjung ngagai penyual ba Miri enggau selampur Sarawak,” terang Halimah.

Kes tu dipansik di baruh Seksyen 39B Akta Dadah Berbahaya (ADB) 1952 lalu enti ditemu salah ulih diukum mati.