Dagang ‘foodtruck’ dibantu RM20,000

KUCHING: Gerempung FoodTruck Bumiputera Sarawak nerima agih belanja RM20,000 ari Perintah Nengeri.

Mandal Ketuai Parti Bumiputera Bersatu (PBB) pampang Satok Datuk Ibrahim Baki madahka agih belanja tu tau dikena ngatur program ungkup gerempung.

“Satok nyadi palan pemadu strategik endur bejalaika dagang baka ‘foodtruck’ laban dikelingi mayuh opis-opis perintah sereta peribit.

“Palan ngengkah kerita tu mega manah endur dagang ‘foodtruck’ lebuh ujung minggu laban engkeman endur bebaika bala anak bejalai ngelantang ati,” ku iya.

Iya bejaku munyi nya lebuh ngarika Kepala Menteri Datuk Patinggi Abang Johari Tun Openg maya ngelanjarka Satok Streetfest Produa FoodTruck 2019 ditu, kemari.

Ku iya, perambu endur ngerataka palan ngengkah kerita nya mega bisi dikerandau sida ngambika meri penyamai ngagai sida ti bedagang dia.

“Kami deka berandau dalam agi sentang ngelakuka palan tu nyadi palan bedagang ‘foodtruck’.

“Kelia, dagang ‘foodtruck’ tu mit tang majak ngerembai nyentukka bisi 49 buah ‘foodtruck’ maya tu,” ku iya.

Sama bisi datai Ketuai Nembiak PBB Satok ti mega Chairman Begulai Satok Streetfest Produa FoodTruck 2019 Dzamaluddin Zainudin, Chairman Begulai Satok Streetfest Produa FoodTruck 2019 ti mega Chairman Gerempung FoodTruck Bumiputera Sarawak Mahathir Ibrahim enggau bala bukai.

Suara Sarawak